Գավառի Սուրբ Աստվածածին եկեղեցին 101 տարեկան է
00:00, 18 Օգոստոս, 2006
ԳԱՎԱՌ, 18 ՕԳՈՍՏՈՍԻ, ԱՐՄԵՆՊՐԵՍ (սեփ. թղթ. Խոսրով Խլղաթյան): Գավառի Սուրբ
Աստվածածին եկեղեցին 101 տարեկան է: Ինչպես տեղեկացանք Գեղարքունյաց հոգեւոր
թեմի առաջնորդարանից, եկեղեցու տարեդարձը համընկել է խաղողօրհնեքի
տոնակատարության հետ եւ այդ առիթով պատարագ է մատուցվել Գեղարքունյաց թեմի
առաջնորդական տեղապահ Մարկոս վարդապետ Հովհաննիսյանի կողմից:
Գավառի երկրագիտական թանգարանում պահպանված փաստաթղթերի համաձայն` եկեղեցու
կառուցումը սկսվել է 1902 թվականին հոգեւորական նշանավոր գործիչ Խորեն
Մուրադբեկյանի նախաձեռնությամբ եւ ճարտարապետ Վասիլի Միրզոյանի նախագծով: Այն
կառուցվել է Գավառի մեծահարուստների միջոցներով, որոնց մեջ հատկապես մեծ է
եղել Հայրապետ աղայի դերը: Սուրբ Աստվածածինը, որը Գեղարքունիքի մարզի մայր
եկեղեցին եւ առաջնորդարանն է, օծվել է 1905 թվականին. առաջին պատարագը
մատուցել է Խրիմյան Հայրիկը: