Եթե Պուտինը Ուկրաինայում հաջողության հասնի, իրական ռիսկ կա, որ ավտորիտար այլ սուբյեկտները կոգեշնչվեն դրանից. Ստոլտենբերգ
14:14, 19 Մարտ, 2024ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: ՆԱՏՕ-ի գլխավոր քարտուղար Յենս Ստոլտենբերգն անդրադարձել է ռուս-ուկրաինական պատերազմին:
«Արմենպրես»-ի փոխանցմամբ՝ Ստոլտենբերգը թեմային անդրադարձավ Երևանում ՀՀ վարչապետ Նիկոլ Փաշինյանի հետ հանդիպումից հետո հայտարարության ժամանակ:
«Ուկրաինայում Ռուսաստանի պատերազմը սթափեցնող հիշեցում է, որ չենք կարող խաղաղությունը չգնահատել: Ես ողջունում եմ ձեր համերաշխությունն Ուկրաինայի հետ և բոլոր գործընկերներին կոչ անում անել իրենցից կախված ամեն ինչ, որ Պուտինը չհաղթի իր պատերազմում»,-ասաց նա:
Ստոլտենբերգը հավելեց՝ մարտադաշտում իրավիճակը մնում է ծանր, այդ պատճառով էլ պետք է ոչ թե պակասեցնել, այլ ավելացնել աջակցությունն Ուկրաինային։
«Եթե Պուտինը Ուկրաինայում հաջողության հասնի, իրական ռիսկ կա, որ նրա ագրեսիան այնտեղ կանգ չի առնի, և ավտորիտար այլ սուբյեկտները կոգեշնչվեն դրանից»,-ասաց ՆԱՏՕ-ի գլխավոր քարտուղարը: