Երևանում հաջորդ տարի նախատեսվում է անցկացնել դուդուկահարների միջազգային փառատոն
16:18, 6 Հուլիս, 2022ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: Երևանում հաջորդ տարի նախատեսվում է անցկացնել դուդուկահարների միջազգային փառատոն, որը կկրի «Ջիվան Գասպարյան» խորագիրը:
«Արմենպրես»-ի հաղորդմամբ՝ այս մասին հուլիսի 6-ին Ջիվան Գասպարյանի կիսանդրու բացման արարողության ժամանակ հայտարարեց ԿԳՄՍ նախարար Վահրամ Դումանյանը:
«Ես համամիտ եմ այն կարծիքի հետ, որ Ջիվան Գասպարյանի նվագը նաև աղոթք է: Իզուր չէր, որ նա հանրության կողմից արժանացավ «Դուդուկի արքա» տիտղոսին: Եվ նախարարությունը ծրագրում է հաջորդ տարի կազմակերպել դուդուկահարների միջազգային փառատոն «Ջիվան Գասպարյան» խորագրով»,-ասաց նախարարը:
Փոխնախարար Արա Խզմալյանն էլ հավելեց, որ հիշատակի պահպանման ամենաճշգրիտ և ամենաարդյունավետ ճանապարհն այն կենդանի պահելն է: «Ջիվան Գասպարյանն այն մարդն է, ով իր գիտակցական ամբողջ կյանքը նվիրել է մեր ծիրանափողի՝ ամենաազգային գործիքի հանրայնացմանն ու միջազգայնացմանը: Ես կարծում եմ, որ նրա վաստակի ու անցած ուղու հանդեպ ամենամեծ գնահատականը կլինի հենց իր անվամբ դուդուկահարների միջազգային փառատոն ունենալը: Քանի որ դուդուկն ընդգրկված է ՅՈՒՆԵՍԿՕ-ի ցանկում, շատ կարևոր է, որ Հայաստանը ունենա միջազգային նախագիծ, որով պարբերաբար ամեն տարի կհաստատի այդ գործիքի սեփականատեր լինելը»,- ասաց Խզմալյանը:
Փոխնախարարն ընդգծեց, որ փառատոնը Ջիվան Գասպարյանի անունով կոչելը ամենամեծ հատուցումը կլինի վարպետի կատարած գործին: Փառատոնի շրջանակում կկազմակերպվեն նաև այս գործիքի մասին հանրային իրազեկվածության բարձրացմանը նպաստող համաժողովներ, քննարկումներ, հրատարակություններ և այլն:
Փոխնախարարը նշեց, որ փառատոնի գաղափարը ներկայացնում են առաջին անգամ: Այն կքննարկվի նաև վարպետի ընտանիքի անդամների հետ:
[gallery id= 66041]