«Հուսո առագաստ-2022». մեկնարկել է հեղինակային երգի միջազգային փառատոնի հայտերի ընդունումը

21:21, 24 Մայիս, 2022

ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: «Սիվիլ արտ» մշակութային հասարակական կազմակերպությունը «Բարդերի ակումբ» ստեղծագործական միավորման հետ արդեն 7-րդ տարին անընդմեջ կազմակերպում է «Հուսո առագաստ» հեղինակային երգի միջազգային փառատոնը:

Ինչպես «Արմենպրես»-ին տեղեկացրին փառատոնի կազմակերպիչները, այս տարի ևս փառատոնն ընթանալու է 2 փուլով՝ նախընտրական և համերգային: «Նախընտրական փուլը ներառում է հայտերի ընդունում, որի համար վերջնաժամկետ է սահմանվել մինչև հունիսի 5-ը: Դրան կհաջորդեն արդեն նախնական լսումները, որի ընթացքում փառատոնի ժյուրիի կազմը կընտրի հայտադիմումներ ներկայացրած մասնակիցներին։ Հավելենք, որ փառատոնին դիմել և մասնակցել կարող են ինչպես հեղինակ-կատարողներն, այնպես էլ կատարողները՝ արդեն հայտնի երգերի սեփական մեկնաբանությամբ: Այս տարի լսումների փուլը կամփոփվի «Մետրո» թատրոնում՝ համերգային ծրագրով, որի մուտքն, ի դեպ, ազատ է: Արդյունքում կորոշվեն «Լավագույն տասնյակ-2022» անվանակարգին արժանի մասնակիցներն, ովքեր իրենց ելույթներով կներկայանան հաջորդ փուլին։

Ի դեպ՝ փառատոնի շրջանակներում լավագույն տասնյակի և մասնակիցների կեցության հարցերը հոգում են փառատունի կազմակերպիչները։ Փառատոնի եզրափակիչ փուլը տեղի կունենա ս.թ. հուլիսի 15-17-ը, Գեղարքունիքի մարզում՝ Շորժա գյուղի հարակից տարածքում՝ «WishUp» լողափում։ Փառատոնի համերգային ծրագիրը նախատեսված է հուլիսի 15-ին ու 16-ին, որի ժամանակ մասնակիցներին կհնանձվեն հավաստագրեր, շնորհակալագրեր ու խորհրդանշական այլ նվերներ:

Փառատոնը կամփոփվի արարողակարգային այս միջոցառմամբ և հեղինակ-կատարողների մի քանի սերունդների մասնակցությամբ՝ մեծ գալահամերգով, որին կմասնակցեն անվանի հայ հեղինակ-կատարողներ, հեղինակային երգի (բարդ) ժանրում նորահայտ ստեղծագործողներ (հեղինակ-կատարողների նոր սերունդ), փառատոնի «Լավագույն տասնյակ» անվանակարգին արժանացած հեղինակ-կատարողներ և Հայաստան ժամանած արտերկրյա հյուրեր, այդ թվում՝ կրկին հեղինակ-կատարողներ»,- ասվում է հաղորդագրության մեջ։

Ըստ աղբյուրի՝ փառատոնը կազմակերպվում է դեռևս 2015 թվականից՝ նպատակ ունենալով հայտնաբերել բարդ ժանրի սկսնակ հեղինակ-կատարողներին և խթանել նրանց ստեղծագործական գործունությանը՝ տրամադրելով բեմ, ստեղծել նաև մշակութային միջավայր: Փառատոնը նպաստում է բարդ ժանրի սիրահարների ու երգահանների հաղորդակցմանը:


© 2009 ARMENPRESS.am