ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Թեև սեզոնային աշխատողների կողմից դեպի Հայաստան դրամական փոխանցումները նվազել են, սակայն միջազգային այցելուների կողմից զգալի փոխանցումների հաշվին ընդհանուր տրանսֆերները նախորդ տարվա համեմատ աճել են:

«Արմենպրես»-ի հաղորդմամբ՝այս մասին ասաց Կենտրոնական բանկի նախագահի տեղակալ Հովհաննես Խաչատրյանը ԱԺ ֆինանսավարկային և բյուջետային հարցերի մշտական հանձնաժողովի նիստում Կենտրոնական բանկի գործունեության վերաբերյալ տարեկան հաղորդման ներկայացմանը՝ անդրադառնալով պատգամավորների հարցերին:

Խաչատրյանը հիշեցրեց դրամական փոխանցումների վերաբերյալ տարեսկզբին ԿԲ-ի արած նվազման կանխատեսումը, այդ թվում Ռուսաստանից՝ 50 տոկոսով:

«Մենք երկու մասի ենք բաժանել տրանսֆերներն այս պահին: Տեսնում ենք, որ ոչ առևտրային նպատակներով փոխանցվող, այսինքն՝ սեզոնային աշխատողների կողմից փոխանցվող գումարները նվազել են, զուգահեռ աճել են միջազգային այցելուների կողմից կատարվող փոխանցումները, իրենք էլ են ինչ-որ ձևով փոխանցումներ կատարում ՀՀ, այդ թվում՝ իրենք իրենց անունով: Գումարային իմաստով աճ կա՝ 2021-ի համեմատ»,- ասաց Խաչատրյանը:

Սակայն, թե միջազգային այցելուների փոխանցումների հետագա շարունակականությունն ինչ չափով, ինչ ինտենսիվությամբ կլինի, հարց է: Այնուամենայնիվ, այդ փոխանցումներն էականորեն ազդել են ընդհանուր դինամիկայի վրա: