Ֆրանսիայի վարչապետը նախագահական ընտրություններից հետո հրաժարական կտա
20:07, 19 Ապրիլ, 2022ԵՐԵՎԱՆ, 19 ԱՊՐԻԼԻ, ԱՐՄԵՆՊՐԵՍ։ Ֆրանսիայի վարչապետ Ժան Կաստեքսը ծրագրում է հրաժարականի դիմում գրել նախագահ Էմանուել Մակրոնին Ֆրանսիայում նախագահական ընտրությունների ավարտից անմիջապես հետո։ «Արմենպրես»-ի հաղորդմամբ, այս մասին հայտնում է ՏԱՍՍ-ը՝ վկայակոչելով Ֆրանսիայի վարչապետի հայտարարությանը։
«Ընտրություններից հետո առաջիկա օրերին, ավանդույթի համաձայն, նախագահին կներկայացնեմ իմ հրաժարականը»,- ասել է նա։
Ապրիլի 16-ին Մարսելում նախընտրական հանրահավաքում ելույթ ունենալիս Մակրոնն ասել է, որ կառավարության խնդիրն է լինելու «կանաչեցնել» տնտեսությունը և հրաժարվել հանածո վառելիքից: Նա նշել է, որ նոր վարչապետն անմիջականորեն ներգրավված է լինելու բնապահպանական պլանավորման մեջ, քանի որ այդ գործունեությունը «ազդում է բոլոր ոլորտների, ծախսերի և ներդրումների վրա»։