«Հայաստան» ու «Պատիվ ունեմ» խմբակցությունները մերժել են Փաշինյանի հետ փակ հանդիպում անցկացնելու առաջարկը
11:00, 23 Դեկտեմբեր, 2021ԵՐԵՎԱՆ, 23 ԴԵԿՏԵՄԲԵՐԻ, ԱՐՄԵՆՊՐԵՍ: Ազգային ժողովի «Հայաստան» և «Պատիվ ունեմ» խմբակցությունները մերժել են ՀՀ վարչապետ Նիկոլ Փաշինյանի հետ փակ հանդիպում անցկացնելու առաջարկը: Ինչպես տեղեկացնում է «Արմենպրես»-ը, այս մասին հայտարարություն են տարածել խորհրդարանի ընդդիմադիր խմբակցությունները:
Հայտարարության մեջ նշվում է, որ Ազգային ժողովի նախագահ Ալեն Սիմոնյանի կողմից ընդդիմադիր խմբակցություններին փոխանցվել է վարչապետ Նիկոլ Փաշինյանի հետ փակ հանդիպում անցկացնելու առաջարկություն:
«Ընդդիմադիր խմբակցությունները հայտնել են, որ հանդիպման կմասնակցեն բացառապես բաց, հավասար և ժողովրդի առջև հաշվետու պայմաններում, ինչը մերժվել է, հետևաբար վերահաստատում ենք փակ հանդիպումների՝ ոչ նպատակահարմար լինելու վերաբերյալ մեր դիրքորոշումը»,- նշված է հայտարարության մեջ: