ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Գերմանիայի նոր արտգործնախարար Աննալենա Բերբոկը նոր պաշտոնում իր առաջին արտերկրյա այցը կիրականացնի դեպի Ֆրանսիա: Ինչպես փոխանցում է «Արմենպրես»-ը, այս մասին հայտնել է Գերմանիայի ԱԳ նախարարությունը:

«Արտգործնախարար Աննալենա Բերբոկն այսօր (դեկտեմբերի 8-ին) իր առաջին այցը կիրականացնի Փարիզ, Բրյուսել և Վարշավա»,- հայտնել  է Գերմանիայի ԱԳ ներկայացուցիչը:

Փարիզում նա դեկտեմբերի 9-ի առավոտյան բանակցություններ կունենա Ֆրանսիայի արտգործնախարար Ժան-Իվ Լե Դրիանի հետ, ապա նույն օրը կմեկնի Բրյուսել՝ հանդիպելու արտաքին գործերի և անվտանգության քաղաքականության հարցերով ԵՄ բարձր հանձնակատար Ժոզեֆ Բորելի հետ: Բացի այդ, Բրյուսելում նա կհանդիպի նաև ՆԱՏՕ-ի գլխավոր քարտուղար Յենս Ստոլտենբերգի հետ:

Դեկտեմբերի 10-ին Աննալենա Բերբոկը Վարշավայում կհանդիպի Լեհաստանի արտգործնախարար Զբիգնև Ռաուի հետ: