ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ:  Ֆուտբոլի Կոնֆերենցիաների լիգայի խմբային փուլի շրջանակում «Ռոմա»-ն տանը ընդունել էր ուկրաինական «Զարյա»-ին:

«Արմենպրես»-ի հաղորդմամբ` Հռոմի Օլիմպիական մարզադաշտում կայացած խաղում «գայլերին» հաջողվեց 4 գնդակ ուղարկել մրցակցի դարպասը` սեփականը պահելով անառիկ: «Ռոմա»-ի կազմում դուբլի հեղինակ դարձավ Թեմի Աբրահամը և մեկական անգամ էլ աչքի ընկան Կառլես Սայոլը և Նիկոլո Ձանյոլոն:

Հայաստանի հավաքականի կիսապաշտպան Հենրիխ Մխիթարյանը «Ռոմա»-ի մեկնարկային կազմում էր, սակայն փոխարինվեց 79-րդ րոպեին։

«Ռոմա»-ն մրցաշարային աղյուսակում երկրորդն է: Հաջորդ` վերջին տուրում Ժոզե Մոուրինյոյի գլխավորած թիմը կմրցի Սոֆիայի ԲԿՄԱ-ի հետ: