«Երևանյան բեսթսելեր». «Բոքոնիկը»՝ առաջատար. մանկական, հոկտեմբեր, 2021
10:09, 19 Նոյեմբեր, 2021ԵՐԵՎԱՆ, 19 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելեր» հեղինակային նախագիծն այս շաբաթ ներկայացնում է մանկական գեղարվեստական ստեղծագործությունների լավագույն տասնյակը՝ ըստ հոկտեմբերի վաճառքի տվյալների:
Առաջին տեղում է «Բոքոնիկը» գիրքը: Բոքոնիկի մասին հեքիաթը հանդիպում է ռուսական և ուկրաինական բանահյուսություններում, ինչպես նաև ունի իր նմանակները շատ ժողովուրդների մոտ: Սյուժեն հանդիպում է սկանդինավյան, գերմանական, ուզբեկական, թաթարական և այլ հեքիաթներում:
Երկրորդ հորիզոնականում է «Ով է ապրում տնակում» հեքիաթը: Հայտնի մանկագիր Վլադիմիր Սուտեևի հեղինակած և արդեն քանի-քանի՜ սերունդների գերած ստեղծագործությունը կօգնի երեխային բացահայտել իրեն շրջապատող աշխարհը: Չէ՞ որ փոքրիկներն աշխարհին նայում են լայն բացված աչքերով: Նրանց հետաքրքիր է ամեն ինչ՝ օրինակ, ինչու է փայտփորիկը հարվածում ծառին, ինչու է սարդը սարդոստայն գործում և այլն: Փոքրիկ ընթերցողներն այս գրքից կիմանան կենդանիների բնակության վայրերի մասին:
Երրորդ հորիզոնականում է «Շաղգամը» հեքիաթը, որը հայտնի է բոլոր փոքրիկներին: Աթաբեկ Խնկոյանի այս ստեղծագործության ներքո որքա՜ն սերունդներ են մեծացել ու իմաստություն ձեռք բերել:
Չորրորդ հորիզոնականում է «Գայլը և յոթ ուլիկները»: Մայր այծը, գնալով տանից, իր ուլիկներին խրատում է զգուշանալ մոտակայքում թափառող գայլից: Գայլը, օգտվելով հարմար առիթից, թակում է այծի տան դուռն ու հայտարարում, որ նրանց մայրն է: Գրիմ եղբայրների հեքիաթի հերոս խորամանկ գայլը փորձում է օգտագործել ցանկացած մեթոդ՝ նպատակին հասնելու համար:
Բոլոր ժամանակների ամենաընթերցվող հեղինակներից մեկի` Հովհաննես Թումանյանի «Հեքիաթներ» ժողովածուն հինգերորդն է: Թումանյանի գործերը պահանջված են բոլոր սերունդների կողմից, դրանք հաճույքով են ընթերցում նաև մեծահասակները: Հեքիաթների հիմքում ընկած են ժողովրդական թեմաներն ու պատումները:
Վեցերորդ հորիզոնականն է զբաղեցնում «Լինում է, չի լինում» ժողովածուն: Այս ժողովածուում ընդգրկված Հանս Քրիստիան Անդերսենի, Գրիմ եղբայրների, Շառլ Պերոյի, Գաբրիել դը Վիլնյովի հեքիաթները փոքրիկների ամենասիրելիներն են, որոնք իրենց նոր նկարազարդումներով էլ ավելի հետաքրքիր կդարձնեն ընթերցումը:
Յոթերորդ հորիզոնականում «Երեք խոզուկները» մանկական հեքիաթն է: Գիրքը հնարավորություն է տալիս փոքրիկներին ծանոթանալու երեք խոզուկների արկածներին:
«Նապաստակի երգը» ութերորդ տեղում է։ Գիրքը Սուրեն Մուրադյանի երգերի վերածված բանաստեղծությունների հետ մեկտեղ ներառում է ձայնային մոդուլ, որի միջոցով հնչում է «Նապաստակի երգը» ստեղծագործությունից մի հատված` Նադեժդա Սարգսյանի անզուգական կատարմամբ:
«Շունն ու կատուն» գիրքը իններորդ հորիզոնականում է: Այս հեքիաթի սյուժեի մասին կարելի է ընդհանրապես չխոսել, քանի որ այն ծանոթ է յուրաքանչյուր փոքրիկի: Թումանյանական այս հեքիաթը սիրված է շատերի կողմից:
«Բոքոնիկը» գրքի մեկ այլ հրատարակություն տասներորդ տեղում է։ Այս տարբերակը բոլորովին նոր դիզայնով է։ Ռուսական ժողովրդական հեքիաթը ներկայանում է եռաչափ պատկերներով ռուս նկարչի բարձրաճաշակ ձևավորմամբ։
«Երևանյան բեսթսելերը» ներկայացրեց Ռոզա Գրիգորյանը
Վարկանիշային ցուցակի կազմման հարցումներին մասնակցել են «Բուկինիստ» (011-53-74-13), «Դարան-Հայ գիրք» (56-80-38), «Զանգակ» (011-22-33-66) գրախանութների և գրատների ցանցերը:
Աստղանիշով նշված գրքերը ցանկ վերադարձածներն են:
Տեղ | Փոփ. | Գիրք | Հրատ. | Քանակ | |
1 | 0 | «Բոքոնիկը» | Բուկինիստ | 79 | |
2 | 0 | «Ով է ապրում տնակում» | Բուկինիստ | 78 | |
3 | 0 | «Շաղգամը» | Բուկինիստ | 62 | |
4 | * | «Գայլը և յոթ ուլիկները» | GSM | 47 | |
5 | * |
Հովհաննես Թումանյան «Հեքիաթներ» |
Բուկինիստ | 44 | |
6 | * | «Լինում է, չի լինում» | Զանգակ | 43 | |
7 | -2 | «Երեք խոզուկները» | Բուկինիստ | 43 | |
8 | նոր | «Նապաստակի երգը» | GSM | 41 | |
9 | * | «Շունն ու կատուն» | Բուկինիստ | 40 | |
10 | նոր | «Բոքոնիկը» | GSM | 40 |
© 2009 ARMENPRESS.am