Պալմա կղզում հրաբուխի ժայթքումից հետո հողի մակարդակը բարձրացել է

19:02, 26 Հոկտեմբեր, 2021

ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Կանարյան կղզախմբի մեջ գտնվող Պալմա կղզում, որտեղ հրաբուխն օրեր շարունակ չի դադարում գործել, հողի մակարդակը բարձրացել է ավելի քան 10 սմ-ով: «Արմենպրես»-ի փոխանցմամբ, այս մասին հայտնել է Իսպանիայի Թագավորության Ազգային երկրաբանական ինստիտուտը:

Վերջին շրջանում Պալմայի վրա ուժեղացել է սեյսմոլոգիական ակտիվությունը: Մասնավորապես, գրանցվել են հարյուրավոր երկրաշարժեր, որոնց մագնիտուդը, սակայն, չի գերազանցել 4.9-ը:

Պալմա կղզու վրա հրաբխի ժայթքումը սկսվել է սեպտեմբերի 19-ին: Լավայի հոսքերը ոչնչացրել են ավելի քան 2 հազար շինություններ, դրանք թափվել են օվկիանոսը, ինչի հետևանքով մթնոլորտ վտանգավոր գազեր են արտանետվել:

Անվտանգության նկատառումներից ելնելով կղզուց տարհանվել է շուրջ 7 հազար մարդ: Տուժածներ չկան:


© 2009 ARMENPRESS.am