Կառավարությունը մանրամասն քննարկում է վարձկանների վերաբերյալ իրավական բոլոր հնարավոր գործընթացները

13:23, 4 Նոյեմբեր, 2020

ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ: ՀՀ կառավարությունը մանրամասն քննարկում է Արցախի նկատմամբ Ադրբեջանի սանձազերծած պատերազմում Թուրքիայի կողմից վարձկան-ահաբեկիչների ներգրավման վերաբերյալ իրավական բոլոր հնարավոր գործընթացները:

«Արմենպրես»-ի փոխանցմամբ` այս մասին Ազգային ժողովում լրագրողների հետ զրույցում ասաց Արդարադատության նախարար Ռուստամ Բադասյանը:

«Հակամարտության գոտում վարձկան-ահաբեկիչների առկայությունը կարող է առաջացնել տարբեր միջազգային հետևանքներ: Կան կոնվենցիաներ, որոնցով նախատեսվում են որոշակի ընթացակարգեր: Ունենալով նման խումբ պարտականություններ` պայքարելու ահաբեկչության ֆինանսավորման դեմ, դեռ մի բան էլ այդ պետություններն իրենք են զինել, ֆինանսավորել ահաբեկիչներին: Կառավարությունում բոլոր իրավական հնարավոր գործընթացները մանրամասն քննարկվում են»,- ասաց Բադասյանը:

Արցախի դեմ սեպտեմբերի 27-ից Ադրբեջանի` Թուրքիայի և վարձկան-ահաբեկիչների աջակցությամբ սանձազերծած ռազմական գործողությունների ընթացքում երեք անգամ` հոկտեմբերի 10-ին Ռուսաստանի, հոկտեմբերի 18-ին Ֆրանսիայի, հոկտեմբերի 26-ին ԱՄՆ-ի միջնորդությամբ հայտարարվել է հրադադարի մասին, սակայն պայմանավորվածության ուժի մեջ մտնելուց րոպեներ անց Ադրբեջանը խախտել է դա, ձեռնարկել դիվերսիոն գրոհներ, հրետակոծել առաջնագիծն ու խաղաղ բնակավայրերը։

Նորայր Շողիկյան


© 2009 ARMENPRESS.am