ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ։ Էրիկ Հարությունյանը նշանակվել է Շուշիի շրջանի վարչակազմի ղեկավար, իսկ Արտյոմ Սարիբեկյանը՝ Քաշաթաղի շրջանի վարչակազմի ղեկավար։ Ինչպես տեղեկացնում է «Արմենպրես»-ը, այս մասին «Ֆեյսբուք»-ի ուղիղ եթերում հայտնել է Արցախի Հանրապետության նախագահ Արայիկ Հարությունյանը։

Նախագահը ներկայացրեց ԱՀ արտակարգ իրավիճակների պետական ծառայության նախկին տնօրեն Վլադիկ Խաչատրյանի՝ իրեն ուղղված նամակը՝ կապված հանրապետության տարածքում իրականացվող հացահատիկային կուլտուրաների բերքահավաքը անկորուստ կազմակերպելու հետ:

Արցախի նախագահն ամենամեծ խնդիրներից մեկը հակահրդեհային միջոցառումները համարեց, որի նկատմամբ անտարբերություն նկատեց։

«Բնական այս աղետն ամեն տարի տեղի է ունենում բերքահավաքի ընթացքում: ԱԻՊԾ նոր տնօրեն Կարեն Սարգսյանին ներկայացնելու ժամանակ՝ ես արդեն նշել եմ, որ դա լինելու է մեր առաջնահերթ խնդիրներից մեկը: Այս առումով կցանկանայի նշել, որ աշխատանքի թերացումներ են եղել Մարտունու և Քաշաթաղի շրջաններում: Մարտունու շրջանում աշխատանքները հիմնականում սկսվել էին, և վարչակազմի ղեկավարին հորդորել եմ էլ ավելի ակտիվացնել, իսկ Քաշաթաղի շրջանի վարչակազմի ղեկավար Ստեփան Սարգսյանը կազատվի իր պաշտոնից՝ այդ աշխատանքներում պասիվություն ցուցաբերելու համար»,- մանրամասնեց Հարությունյանը:

Արցախի նախագահը նշեց, որ այդ վարքագիծը պետք է օրինակ լինի բոլորի համար, և, հանձնարարականները չկատարելու առումով, լինելու են նմանատիպ որոշումներ:

Իսկ մեկ այլ որոշմամբ՝ Արտյոմ Սարիբեկյանը նշանակվեց Քաշաթաղի շրջանի վարչակազմի ղեկավար: Նա մինչ այդ աշխատում էր «Արցախանտառ» ՊՈԱԿ-ի Քաշաթաղի մասնաճյուղի կառավարչի պաշտոնում:

Հարությունյանն ընդգծեց, որ նշանակումները պետք է կատարվեն տեղական կադրերի միջոցով:

Կարեն Խաչատրյան