Մեծ տոն փոքրիկների համար. մեկնարկեց ցուցահանդես-վաճառք` նվիրված մանուկներին և պատանիներին
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Մանուկներին և պատանիներին գրականությանը մոտեցնելու, ընթերցանությունը խթանելու նպատակով «Էդիթ պրինտ» հրատարակչությունը Խնկո-Ապոր անվան ազգային մանկական գրադարանի հետ համատեղ դեկտեմբերի 20-21-ին իրականացնում է ցուցահանդես-վաճառք` ներկայացնելով մանկապատանեկան հարուստ գրականություն:
«Արմենպրես»-ի հաղորդմամբ`նախաձեռնության շրջանակում կանցկացվեն մի շարք նոր ստեղծագործությունների շնորհանդեսներ, կինոդիտում և այլ միջոցառումներ:
«Արդեն երրորդ անգամ ենք գրադարանում կազմակերպում ցուցահանդես-վաճառքը, որը հագեցած է բազմաժանր ու բազմաբովանդակ միջոցառումներով: Կարծում ենք, որ մանուկների և պատանիների համար ստեղծված գրականությունը պետք է արժևորել, կարևորել: Մենք մեկը մյուսից հետաքրքիր գրքեր ունենք, որոնք նախատեսված են փոքրիկների և պատանիների համար: Այս օրերին այցելուները կարող ենք գրքերը ձեռք բերել զեղչերով, գեղեցիկ փաթեթավորմամբ և նվերներով»,-նշեց «Էդիթ պրինտ» հրատարակչության հասարակայնության հետ կապերի պատասխանատու Ռոզա Գրիգորյանը:
Նա տեղեկացրեց, որ ցուցահանդես-տոնավաճառին կանցկացվի նաև «Հեքիաթի ժամ» միջոցառումը. մանուկները հեքիաթ կունկընդրեն, հնարավորություն կունենան դիտել դետեկտիվի թագուհի Ագաթա Քրիստիի «Եվ ոչ ոք չմնաց... » ստեղծագործության հիման վրա նկարահանված «Десять негритят» ռուսերեն ֆիլմը:
Բաժանորդագրվեք մեր ալիքին Telegram-ում