Զարուհի Բաթոյանը առողջության ապահովագրության համակարգը համարում է սոցիալական լուրջ ներդրում
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ աշխատանքի և սոցիալական հարցերի նախարար Զարուհի Բաթոյանը կողմ է առողջության համապարփակ ապահովագրության համակարգի ներդրմանը:
«Արմենպրես»-ի հաղորդմամբ՝ այս մասին Բաթոյանն ասաց լրագրողների հետ զրույցում:
«Ուրախ ու երջանիկ կլինեմ, եթե առողջության ապահովագրությունը ներդրվի: Անհամբերությամբ սպասում եմ դրան, որովհետև, մեր ոլորտի բազմաթիվ խնդիրներ միանգամից կլուծվեն»,- նշեց Աշխատանքի և սոցիալական հարցերի նախարարը:
Նրա խոսքով՝ առողջության պարտադիր ապահովագրությունը սոցիալական լուրջ ներդրում է:
«Գուցե մենք այնտեղ լուրջ ռեսուրսներ ներդնենք, բայց սոցիալական ոլորտում լուրջ ռեսուրսներ կարող ենք խնայել, որովհետև աղքատության կրճատման, հաշմանդամություն ունեցող անձանց, տարեցների, երեխաների ամենաառաջնային կարիքները առողջապահական ոլորտում են և մարդիկ դիմում են սոցիալական որևէ կարգավիճակ ստանալու, որպեսզի առողջապահական ծառայություն ստանան»,- ընդգծեց Բաթոյանը:
ՀՀ առողջապահության նախարարությունը ներկայացրել է առողջության համապարփակ ապահովագրության փաթեթ՝ առաջարկելով աշխատող քաղաքացիների աշխատավարձից պահել ամսական 6 տոկոս առողջության հարկ:
Դեկտեմբերի 7-ին՝ ՀՀ ֆինանսների նախարար Ատոմ Ջանջուղազյանն իր ասուլիսի ժամանակ հայտնել էր, որ «առողջության հարկ» նախատեսող հայեցակարգի վերաբերյալ դեռ վերջնական կայացված որոշում չունի: Նա տեսնում է հարցի համակողմանի քննարկման, առողջության ապահովագրության համար նաև այլընտրանքային տարբերակի քննարկման կարիք:
Բաժանորդագրվեք մեր ալիքին Telegram-ում