ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Հանրային խորհրդի նորանշանակ անդամ Դանիել Իոաննիսյանը խոստանում է ներդնել բոլոր ջանքերը ՀԽ արդյունավետ գործունեության համար: Այդ մասին Իոաննիսյանը նշեց կառավարության նիստից հետո լրագրողների հետ զրույցում:  

«Քանի որ Սահմանադրությամբ նման մարմին պետք է գոյություն ունենա, ապա այն պետք է լինի արդյունավետ, իսկ ես դրա համար ջանքեր կգործադրեմ։ Լինել Հանրային խորհրդի անդամ՝ չի նշանակում կախված լինել իշխանություններից։ Անգամ աշխատավարձ չեմ ստանալու։ Եվ կաշկանդված չեմ իշխանությունների այն մոտեցումների քննադատության հարցերով, որոնց հետ համաձայն չեմ։ Վարչապետի աշխատակազմը ինձ լավություն չի արել։ Դա ավելի շուտ լրացուցիչ պարտականություն է»,- «Արմենպրես»-ի հաղորդմամբ` ասաց Իոաննիսյանը՝ ավելացնելով, որ հետագայում, ինչպես և առաջ, մտադիր է քաղաքական զսպվածություն ցուցաբերել։