Եվրանեսթ ԽՎ հանձնաժողովներում հայկական պատվիրակության բոլոր առաջարկներն ընդունվել են
ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Թբիլիսիում կայացած Արեւելյան գործընկերության «Եվրանեսթ» խորհրդարանական վեհաժողովի 4 հանձնաժողովները ընդունել են ներկայացված բանաձևերի համար հայկական պատվիրակություն բոլոր 13 առաջարկները:
«Արմենպրես»-ի հաղորդմամբ՝ ՀՀ ազգային ժողովում հրավիրված ասուլիսում այս մասին հայտնեց հայկական պատվիրակության ղեկավար Գայանե Աբրահամյանը:
«Չորս հանձնաժողովների բանաձևերում մենք ընդհանուր 13 առաջարկ էինք ներկայացրել, որոնք բոլորն անցան բոլոր հանձնաժողովներում: Կարծում եմ, որ դա իսկապես մեծ հաջողություն է: Սոցիալական հանձնաժողովում առաջարկել էինք, որ կրթության խնդիրներին առնչվող բանաձևում ներառվի հետևյալը՝ Արևելյան գործընկերության բոլոր երկրներում բացառվի այլատյացության քարոզը և այլատյացության ուսուցումը պետական մակարդակում նաև այլընտրանքային կրթական համակարգում: Առաջարկն ընդունվել է»,-ասաց Աբրահամյանն ու հավելեց՝ դա, բնականաբար, վերաբերում է Ադրբեջանի հայատյացության քարոզին ու հայատյացության քաղաքականությանը:
Քաղաքական հանձնաժողովում հայկական պատվիրակության անդամները ներկայացրել են 8 առաջարկ: Աբրահամյանը նշեց՝ առաջարկներից ամենակարևորն էր՝ արձանագրվեց, որ Հայաստանը բավականին լուրջ առաջընթաց է ապահովել Հայաստան-ԵՄ համապարփակ և ընդլայնված գործընկերության համաձայնագրի ճանապարհային քարտեզի աշխատանքների ուղղությամբ: Մնացած առաջարկները վերաբերել են համակարգային կոռուպցիայի մակարդակի նվազեցմանը և դրա դեմ պայքարին:
Արեւելյան գործընկերության Եվրանեսթ խորհրդարանական վեհաժողովի լիագումար նստաշրջանի աշխատանքները կայացել են դեկտեմբերի 7-10-ը Թբիլիսիում:
Բաժանորդագրվեք մեր ալիքին Telegram-ում