Հումանիտար ականազերծման կենտրոնի մասնագետները դասընթացներ են կազմակերպել դպրոցականների համար
ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՆՊՐԵՍ: Հումանիտար ականազերծման և փորձագիտական կենտրոնի Ականների վտանգի իրազեկման մասնագետները 1 տարվա ընթացքում դասընթացներ են կազմակերպել Տավուշի, Արագածոտնի, Լոռու, Արարատի, Սյունիքի, Գեղարքունիքի, Կոտայքի մարզերի և Երևանի դպրոցականների համար:
«Արմենպրես»-ին այս մասին հայտնեց Հումանիտար ականազերծման և փորձագիտական կենտրոնի հասարակայնության հետ կապերի պատասխանատու Նազելի Էլբակյանը: Դասընթացներին ավելի քան 11024 աշակերտ և ուսուցիչ է մասնակցել: Նրանք արդեն տիրապետում են անվտանգ վարքագծի կանոններին:
Ականների վտանգի իրազեկման բաժնի մասնագետները նաև թարմացրել են ականից տուժած անձանց տվյալների բազան: 2019 թվականի ընթացքում շուրջ 70 անձի վերաբերյալ տեղեկատվություն են հավաքել:
Ականի պայթյունից տուժած անձինք պարբերաբար տարբեր ծրագրերում են ընդգրկվում՝ Հումանիտար ականազերծման և փորձագիտական կենտրոնի և մի շարք կառույցների գործակցության արդյունքում:
Բաժանորդագրվեք մեր ալիքին Telegram-ում