Մանկավարժական համալսարանում բացվել է չինական մշակույթի կենտրոն
ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՆՊՐԵՍ: Խաչատուր Աբովյանի անվան հայկական պետական մանկավարժական համալսարանում բացվեց չինական մշակույթի կենտրոն:
«Արմենպրես»-ի հաղորդմամբ՝ ՀՊՄՀ ռեկտոր Ռուբեն Միրզախանյանը նշեց, որ վերջին տարիներին որոշակի համագործակցություն է հաստատվել ՀՊՄՀ-ի և Չինաստանի մի շարք ԲՈւՀ-երի միջև:
«Մենք համագործակցում ենք Չինաստանի հարավ-արևմտյան հատվածում գտնվող Չունցինի համալսարանի, Տյանցզինի և Նանկինի մանկավարժական համալսարանների հետ: Այսօր չինարենը որպես երկրորդ օտար լեզու ուսումնասիրվում է մանկավարժական համալսարանի օտար լեզուների ֆակուլտետում և նույն հաստատության հիմնական դպրոցում»,- շեշտեց Միրզախանյանը:
ՀՀ-ում Չինաստանի ժողովրդական Հանրապետության արտակարգ և լիազոր դեսպան Թիան Էրլունգը՝ ողջունելով ներկաներին, կարևորեց ՀՊՄՀ-ում չինական մշակույթի կենտրոնի բացումը:
«Նմանատիպ կենտրոնների բացումը կնպաստի նրան, որ հայերն ավելի լավ ճանաչեն չինական մշակույթն ու ավանդույթները, նույնն էլ անհրաժեշտ է իրականացնել մեր երկրում՝ Չինաստանում: Մեր երկրների միջև եղած հարաբերությունները շատ ակտիվ զարգանում են»,- ասաց Էրլունգը և հավելեց, որ այդ կենտրոնի բացումը շատ կարևոր է ուսանողների համար:
Միջոցառման ժամանակ Մանկավարժական համալսարանի հիմնական դպրոցի սաները Ամանորի թեմատիկայով բանաստեղծություններ արտասանեցին:
Բաժանորդագրվեք մեր ալիքին Telegram-ում