ԱԺ-ն երկրորդ ընթերցմամբ չընդունեց խմբակցությունների փորձագետների թիվն ավելացնելու օրենքի նախագիծը
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովը երկրորդ ընթերցմամբ չընդունեց «Բարգավաճ Հայաստան» խմբակցության պատգամավոր Արման Աբովյանի ներկայացրած օրենքի նախագիծը:
«Արմենպրես»-ի հաղորդմամբ՝ նախագծով առաջարկվում էր ավելացնել խմբակցությունների փորձագետների թիվը:
Աբովյանը նշել էր, որ առկա կարգավորման համաձայն՝ եթե խմբակցության անդամները 14-ից ավելի են, ապա փորձագետների թիվը 4 է, նա առաջարկել էր խմբակցություններում ավելացնել ևս 1-ական փորձագետի հաստիք: Պատգամավորը հիմնավորել էր՝ այնպիսի իրավիճակում են, որ բացի նրանից, որ օրենսդրական նախաձեռնությունները շատ են, դրանք նաև որակապես տարբերվում են նախկիններից: Աբովյանը շեշտել էր, որ փորձագետները ֆիզիկապես չեն հասցնում այդ ծավալի օրենքների շուրջ աշխատել:
Դեկտեմբերի 6-ին ընթացող նիստում «Իմ քայլը» խմբակցության անդամ Լիլիթ Մակունցը հայտնեց, որ իրենց խմբակցությունը քվեարկելու է ազատ:
Օրենքի նախագիծը երկրորդ ընթերցմամբ չընդունվեց 51 կողմ, 25 դեմ և 15 ձեռնպահ ձայներով: Նախագծի ընդունման համար անհրաժեշտ էր 80 կողմ ձայն:
ԱԺ կանոնակարգ սահմանադրական օրենքում փոփոխություն կատարելու մասին օրենքի նախագիծն առաջին ընթերցմամբ ընդունվել է հոկտեմբերի 1-ի նիստում՝ 81 կողմ,4 դեմ և 23 ձեռնպահ ձայներով:
Բաժանորդագրվեք մեր ալիքին Telegram-ում