Մոսկվայի տանը կազմակերպվեց Բելառուսի մշակույթի օրվան նվիրված համերգ
ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանում Բելառուսի դեսպանությունը բելառուսական համայնքի հետ համատեղ Երևանի Մոսկվայի տանը դեկտեմբերի 5-ին կազմակերպեց համերգ՝ նվիրված Բելառուսի մշակույթի օրվան: Ինչպես տեղեկացնում է «Արմենպրես»-ը, միջոցառմանը ներկա էր Հայաստանում Բելառուսի Հանրապետության դեսպան Իգոր Նազարուկը, բելառուսական համայնքի ներկայացուցիչներ, դիվանագետներ և հյուրեր:
Իգոր Նազարուկը շնորհակալություն հայտնեց բոլոր նրանց, ովքեր գնահատում են բելառուսական մշակույթը և ազգային ավանդույթները: Դեսպանը կարևորեց գյուղական համայքների կենսամակարդակի և հեղինակության բարձրացումը, քանի որ Բելառուսի ազգային մշակույթը և ավանդույթը հիմնականում պահպանվել են գյուղերում:
«Բելառուսում 2018 թվականից մեկնարկել է «Փոքր հայրենիքի տարի» նախաձեռնությունը, որը առաջ է մղել Բելառուսի նախագահ Ալեքսանդր Լուկաշենկոն: Գաղափարը նրանում է, որ հաջողության հասած մարդկանց միջոցով բարձրացնենք մեր համայնքների բնակիչների կենսամակարդակը և հեղինակությունը, որպեսզի քաղաքացիները կարողանան ապրել հարմարավետ և արժանի կյանքով ոչ միայն մեծ քաղաքներում, այլ նաև գյուղերում»,- ընդգծեց Նազարուկը:
Համերգի ընթացքում ներկայացվեցին բելառուսական ազգային երգերը և պարերը:
Միջոցառման շրջանակներում ցուցադրվում էին «Արմենպրես» և «Բելտա» լրատվական գործակալությունների կողմից տրամադրված լուսանկարները, որոնցում ներկայացված էին բելառուսական ժողովրդական ծիսակատարությունները, ինչպես նաև Բելառուսի տեսարժան վայրերը և գեղեցիկ շինությունները:
Բաժանորդագրվեք մեր ալիքին Telegram-ում