Վերաբացվեց Բասենի մանկապարտեզը
ԳՅՈՒՄՐԻ, 5 ԴԵԿՏԵՄԲԵՐԻ, ԱՐՄԵՆՊՐԵՍ: Վերանորոգումից հետո դեկտեմբերի 5-ին վերաբացվեց Ախուրյան համայնքի Բասեն բնակավայրի մանկապարտեզը։ Ինչպես հաղորդում է «Արմենպրես»-ը, մանկապարտեզը հիմնանորոգվել է պետության կողմից տրամադրված սուբվենցիոն ծրագրի շրջանակներում՝ 10 մլն 950 հազար դրամ գումարով, ՏԻՄ աջակցությամբ՝ համայնքի կամավորների կողմից։ Ծրագիրն իրականացվել է «Մի բան անենք» համայնքային զարգացմանն ուղղված ազգային արշավի շրջանակներում:
Նախաձեռնությունն իր ավարտուն տեսքն է ստացել ԱՄՆ Միջազգային զարգացման գործակալության աջակցությամբ իրականացվող «Աջակցություն Հայաստանին» ծրագրի շնորհիվ:
Վերանորոգման արդյունքում մանկապարտեզն այժմ կարող է ընդունել 90 երեխայի՝ 60-ի փոխարեն: «Մանկապարտեզի մի հատվածի վերանորոգման, բակի բարեկարգման աշխատանքները և գույքի ձեռքբերումը հնարավոր դարձավ կամավորների աշխատանքների շնորհիվ: Համայնքի կամավորներին միացան նաև սփյուռքից ժամանած կամավորները: Սա ևս մեկ անգամ փաստում է, որ մենք ինքներս պետք է կառուցենք ու շենացնենք մեր հայրենիքը», - նշեց Բասենի վարչական ղեկավար Ռոման Համայակյանը:
«Այսօր շատ կարևոր օր է՝ կարևոր կոչով՝ «Մի բան անենք», ու եթե կա ցանկություն ու հետևողականություն, ամեն ինչ հաստատ լավ է լինում, ինչի ապացույցն այս հրաշալի մանկապարտեզն է: Սա տարբեր կառույցների միասին աշխատելու լավ օրինակ է»,-ասաց Շիրակի մարզպետ Տիգրան Պետրոսյանը:
ԱՄՆ ՄԶԳ հայաստանյան առաքելության տնօրեն Դեբորա Գրիզերը, շնորհավորելով բոլորին ու հատկապես համայնքի բնակիչներին, նշեց, որ սա համայնքի ուժերի համախմբման լավագույն օրինակն է: «Անչափ ոգևորիչ է տեսնել կամավորության ոգին և միասնականությունը, որ համայնքն հանդես է բերել՝ համայնքի փոքրիկների համար մանկապարտեզը վերանորոգելու հարցում»,-նշեց Դեբորա Գրիզերը:
«Մի բան անենք» արշավի նպատակն է նպաստել համայնքերի զարգացմանն ու հզորացմանը: Արշավը կշարունակվի նաև հաջորդ տարի՝ Գյումրի, Արթիկ և Ամասիա համայնքներում:
Արմենուհի Մխոյան
Բաժանորդագրվեք մեր ալիքին Telegram-ում