«Արմենպրես»-ի հաղորդմամբ` այս մասին ՀՀ ազգային ժողովում հրավիրված ասուլիսում խոսեցին հայկական պատվիրակության անդամները: «Նստաշրջանի հարցերից մեկը Բաքվում տեղի ունեցած 53-րդ լիագումար նիստի արձանագրության հաստատումն էր: Մեր պատվիրակությունը չի մասնակցել Բաքվում տեղի ունեցած նիստին, ինչը թույլ էր տվել, որ ադրբեջանցի պատվիրակները որոշ անթույլատրելի արտահայտություններ հնչեցնեին»,-ասաց Բաբկեն Թունյանն ու հավելեց` դրանք արժանի պատասխան են ստացել:

Հայկական պատվիրակությունը զգուշացրել է, որ արձանագրությունը հաստատում է վերապահմամբ, որ տնտեսական համագործակցության կազմակերպությունը քաղաքական մանիպուլյացիայի և պրովոկացիաների տեղ չէ: «Եթե առաջիկայում նման բան կրկնվի, քայլերն ավելի կոշտ կլինեն»-նշեց Թունյանը:

Հանձնաժողովներում և լիագումար նիստում զեկույցներով հանդես է եկել Վահե Էնֆիաջյանը` անդրադառնալով նաև տարածաշարջանային իրավիճակին: «Քաղաքական հարցերի հանձնաժողովում ներկայացրել եմ տարածաշրջանի առանձնահատկությունները: Արձանագրել եմ, որ միջազգային նորմերին հակասող ձևով Թուրքիայի և Ադրբեջանի կողմից Հայաստանի սահմանները փակ են պահվում: Անդրադարձել եմ նաև Արցախում քաղաքական իրավիճակին: Այդ հարցերի հետ կապված տարաձայնություն ենք ունեցել Ադրբեջանի պատվիրակության ներկայացուցիչների հետ: Դրա հետ կապված ներկայացվել են մանրամասներ ու տրվել սպառիչ պատասխաններ»,-ասաց Էնֆիաջյանը:

Նա նշեց` որքան էլ վեհաժողովի առաքելությունը տնտեսական է, սակայն ադրբեջանական կողմից քաղաքական բաղադրիչն անպակաս է լինում: Պատգամավորը վստահեցրեց, որ դրանք մշտապես իրենց կողմից հստակ ու կտրուկ արձագանքի են արժանանում: