ՄԻՊ-ն ամփոփեց «Իմ ընկեր» թեմայով շարադրությունների մրցույթի արդյունքները
ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Մարդու իրավունքների պաշտպանի գրասենյակը նոյեմբերի 18-ին ամփոփեց «Իմ ընկեր» թեմայով շարադրությունների մրցույթը, որն անցկացվում էր «Փոխիր աշխարհը» ներառական կրթության խրախուսմանն ուղղված իրազեկման արշավի շրջանակում:
«Արմենպրես»-ի հաղորդմամբ` Մարդու իրավունքների պաշտպանի աշխատակազմը ստացել էր ավելի քան 700 շարադրություն Երևանից և մարզերից: Առանձնացվել էր երեսունը:
Խրախուսական մրցանակի արժանացավ քսան աշակերտ, հատուկ մրցանակի` հինգ աշակերտ: Մրցույթի հինգերորդ տեղը զբաղեցրեց Տիգրան Մելքոնյանը, չորրորդ տեղը`Քրիստինե Սաֆարյանը, երրորդ հորիզոնականը գրավեց Զարուհի Ոսկանյանը, երկրորդ մրցանակին արժանացավ Սոնա Հակոբյանը, առաջին տեղը զբաղեցրեց Լուիզա Սարգսյանը: Մրցանակակիրներին հանձնվեցին եզակի գրքեր և նվերներ:
«Հայաստանի Հանրապետությունը գտնվում է բարեփոխումների պատասխանատու փուլում և դրա կարևոր մաս է կազմում ներառական կրթության համակարգի զարգացումը: Մեր պետությունը պարտավոր է ապահովել յուրաքանչյուր երեխայի կրթության իրավունքը: Որևէ երեխա չպետք է դուրս մնա կրթական համակարգից կամ զրկվի կրթվելու հնարավորությունից միայն այն պատճառով, որ սոցիալապես անապահով է կամ առողջական վիճակի բերումով առանձնահատկություն ունի: Մենք պետք է գնահատենք յուրաքանչյուր երեխայի արժանապատվությունը, ներուժը»,-շեշտեց Մարդու իրավունքների պաշտպան Արման Թաթոյանը:
ՀՀ աշխատանքի և սոցիալական հարցերի նախարար Զարուհի Բաթոյանի խոսքով`երեխաներին պետք է չխանգարել սովորել, ընկերություն անել, և դա կարևոր ներդրում կլինի: «Մոտավորապես քսան տարի առաջ, երբ «Հույսի կամուրջ» հասարակական կազմակերպությունում էի աշխատում, առաջին քայլերն էինք անում Հայաստանում ներառական կրթության զարգացման համար: Ես դպրոցներում սեմինարներ էի վարում երեխաների համար: Ամենակարևոր շեշտադրումն այն էր, որ խնդիրը ոչ թե մարդու մեջ է, այլ` միջավայրի: Մենք պետք է փոխենք միջավայրը, մարդկանց, նրանց վերաբերմունքը»,-ընդգծեց նախարարը:
Միջոցառմանը ներկայացվեցին «Փոխիր աշխարհը» արշավի շրջանակում նկարահանված 4 հերոսների մասին պատմող տեսանյութեր, տեղի ունեցավ «Միասին կարող ենք փոխել աշխարհը» տեսահոլովակի պրեմիերան:
Ներառական կրթությունը խրախուսելու համար Հայաստանի Հանրապետության մարդու իրավունքների պաշտպանը #փոխիրաշխարհը իրազեկման արշավի շրջանակում հայտարարում է «Իմ ընկեր․․․» թեմայով շարադրությունների մրցույթ։
Ստեղծագործական աշխատանքի միջոցով յուրաքանչյուր երեխա իր օրինակով պետք է ցույց տար, թե ինչպես կարող է իր ընկերոջ նկատմամբ վերաբերունքով փոխել աշխարհը՝ դարձնելով այն ներառական ու համերաշխ։
Բաժանորդագրվեք մեր ալիքին Telegram-ում