Հայաստանում ՉԺՀ դեսպանը պարգևներ հանձնեց չինարենը դասավանդողներին և ուսումնասիրողներին
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Հայ-չինական բարեկամության դպրոցում նոյեմբերի 15-ին Հայաստանում Հանրապետությունում Չինաստանի Ժողովրդական Հանրապետության դեսպան Թիան Էրլունը պարգևներ և վկայականներ հանձնեց չինարենը դասավանդողներին և ուսումնասիրողներին: Ինչպես տեղեկացնում է «Արմենպրես»-ը, հանձնման արարողությանը ներկա էին ՀՀ կրթության, գիտության, մշակույթի և սպորտի նախարարի տեղակալ Արևիկ Անափիոսյանը, չինարեն դասավանդողները, ուսանողները և ուսուցիչները:
Դեսպան Էրլունը հույս հայտնեց, որ մրցանակները կնպաստեն չինարեն ուսումնասիրողների արդյունավետ աշխատանքին, որն իր հերթին կնպաստի հայ-չինական հարաբերությունների էլ ավելի զարգացմանը:
«Երկու երկրների հարաբերությունների զարգացման առումով Կոնֆուցիոսի ինստիտուտը, ինչպես նաև Հայ-չինական բարեկամության դպրոցը խթանում է չինարենի դասավանդման և ուսուցանման որակի անընդհատ զարգացմանը: Այս պահին Հայաստանում չինարեն սովորում են 2800 մարդ, իսկ Կոնֆուցիոսի ինստիտուտի դասընթացները կազմում են տարեկան 130 դաս, ինչն ինձ հաճելիորեն զարմացրեց: Շեշտեմ, որ այս պահին Հայաստանում է գտնվում 30-ից ավել ազգությամբ չինացի ուսուցիչ և կամավոր»,- ընդգծեց Էրլունը:
ՀՀ կրթության, գիտության, մշակույթի և սպորտի նախարարի տեղակալ Արևիկ Անափիոսյանի կարծիքով` չինարենի ուսումնասիրությունը լավագույն ճանապարհն է Չինաստանի լեզվամշակույթը հասկանալու համար:
«Հայաստանում առկա հետաքրքրվածությունը չինարենի նկատմամբ լավագույն դրսևորումն է, թե ինչ մեծ կարևորություն է տրվում հայ-չինական բարեկամական հարաբերություններին: Կարծում եմ, որ ամբողջ աշխարհում մշակույթների մասին կարող ենք իմանալ, տեղեկանալ և տիրապետել միայն լեզվի ուսումնասիրությամբ»,- շեշտեց Անափիոսյանը:
Բաժանորդագրվեք մեր ալիքին Telegram-ում