Ժամանակը Երևանում՝ 11:07:36,   15 Դեկտեմբեր

Լիճք գյուղում տեղի ունեցավ մանկապարտեզի բացման հանդիսավոր արարողություն

Լիճք գյուղում տեղի ունեցավ  մանկապարտեզի բացման հանդիսավոր արարողություն

ԳԱՎԱՌ, 12 ՆՈՅԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Լիճք համայնքի նորակառույց մանկապարտեզն ընդունեց  իր առաջին սաներին՝  դռները բացելով  նախադպրոցական տարիքի 96 երեխաների առջեւ:

«Արմենպրես»-ի տեղեկացմամբ՝ մանկապարտեզի բացման ժապավենը կտրեցին Գեղարքունիքի մարզպետ Գնել Սանոսյանը, եւ Լիճքի գյուղապետ Գնել Գրիգորյանը՝ մանկապարտեզի երկու սաների մասնակցությամբ: Մարզպետը եւ համայնքի ղեկավարը տնօրեն Կարինե Շաբոյանի ուղեկցությամբ շրջեցին մանկապարտեզի խմբերում, խոհանոցում ու ճաշարանում, ծանոթացան շենքային, գույքային եւ ուսումնադաստիարակչական  պայմաններին: Տնօրենի ներկայացմամբ՝ մանկապարտեզում կեցության, ուսումնառության ու ստեղծագործական ձիրքերի զարգացման համար ստեղծված են բոլոր անհրաժեշտ պայմանները: «Բացվել է երեք խումբ՝ 96 տեղով: Աշխատակազմը լիովին պատրաստ է՝ երեխաներին նախադպրոցական անհրաժեշտ կրթություն ու դաստիարակություն ապահովելու համար:Մանկապարտեզը կարող է ապահովել մինչեւ 100 տեղ, սակայն պահանջարկը շատ ավելին է»,-ներկայացրեց Կարինե Շաբոյանը:

Համայնքի ղեկավար Գնել Գրիգորյանի ներկայացմամբ՝ ներկա պահին Լիճքում հաշվառված է 3-5 տարեկան 250 երեխա, ուստի անհրաժեշտ կլինի մանկապարտեզը ընդլայնել կամ բացել երկրորդ մանկապարտեզը: «Մեր գյուղն իր պատմության 190 տարիների ընթացքում առաջին անգամ է վայելում մանկապարտեզ ունենալու երջանկությունը: Շնորհակալ ենք ՀՀ կառավարությանն ու Գեղարքունիքի մարզպետարանին, որոնց բարի կամքի շնորհիվ  արդեն համայնքի երեխաները մանկապարտեզ հաճախելու հնարավորություն ունեցան:Համոզված եմ, որ նորաբաց մանկապարտեզի շնորհիվ մեր երեխաները կյանքում կլինեն ավելի կիրթ, ավելի դաստիարակված ու զարգացած մարդիկ»,-նշեց համայնքի ղեկավարը: «Բոլորիդ ողջունում ու շնորհավորում եմ այս գեղեցիկ օրվա, այս կարեւոր ձեռքբերման առթիվ: Քիչ ջանքեր ու միջոցներ չեն ներդրվել, մինչեւ որ հասել ենք այս ցանկալի պահին: Սակայն, ի ուրախություն մեզ, պարզվում է, որ Լիճքում գրեթե կրկնակի անգամ ավելին է մանկապարտեզի տարիքի երեխաների թիվը, ու մենք այսօրվանից պիտի մտածենք մանկապարտեզի ընդլայնման մասին: Բոլորիդ մաղթում եմ երջանկություն»,-ներկաներին դիմեց մարզպետ Գնել Սանոսյանը: Մանկապարտեզի բացման միջոցառումը գեղարվեստական կատարումներով համամեցին Լիճքի մշակույթի տան «Լիճք» ազգագրական-ժողովրդական երգի-պարի խմբի սաները:

Լիճք համայնքի ղեկավարի տեղեկացմամբ՝ Լիճքի մանկապարտեզը կառուցվել է Հայաստանի տարածքային զարգացման հիմնադրամի միջոցներով եւ Լիճքի համայնքապետարանի համաֆինանսավորմամբ: Ծախսվել է շուրջ 150 միլիոն դրամ, որից 15 միլիոն դրամը կազմել է Լիճքի համայնքապետարանի համաֆինանսավորումը: Մանկապարտեզը գործելու է շուրջտարյա, որի համար գյուղապետարանի տարեկան ծախսը կազմելու է շուրջ 25 միլիոն դրամ:

Մանկապարտեզի բացման արարողության ավարտից հետո Գեղարքունիքի մարզպետ Գնել Սանոսյանն այցելեց  Լիճքի միջնակարգ  եւ հիմնական դպրոցներ՝ ծանոթանալու ուսումնական պարապմունքների ընթացքին ու պայմաններին ու ի հայտ եկած խնդիրներին: Մարզպետը Լիճքում դիտարկեց  նաեւ Հայաստանի ֆուտբոլի ֆեդերացիայի միջոցներով ու համայնքապետարանի համաֆինանսավորմամբ կառուցվող ֆուտբոլի փոքր խաղադաշտի շինարարական աշխատանքները, որոնք արդեն մոտենում են ավարտին:

Խոսրով Խլղաթյան




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ