ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: ԱՄՆ-ի նախագահ Դոնալդ Թրամփը խնդիրների ուժային լուծման կողմնակից չԷ, բայց անհրաժեշտության դեպքում պատրաստ կլինի ռազմական ուժ կիրառել Թուրքիայի դեմ ի պատասխան Սիրիայում նրա գործողությունների: Այդ մասին, ինչպես տեղեկացնում Է «Արմենպրես»-ը, հայտարարել Է Միացյալ Նահանգների Պետդեպարտամենտի ղեկավար Մայքլ Փոմպեոն:

«Մենք խաղաղությունը նախընտրում ենք պատերազմից: Բայց եթե մեզանից պահանջվեն գործողություններ կամ նույնիսկ ռազմական գործողություններ, ապա դուք պետք Է հասկանաք, որ նախագահ Թրամփը դրանց լիովին պատրաստ Է»,- ասել Է Փոմպեոն CNBC-ին տված հարցազրույցում:

Ընդսմին հեռուստաալիքը պարզաբանում Է, որ պետքարտուղարը խոսում Էր հենց Թուրքիայի դեմ գործողությունների մասին:

Դրա հետ մեկտեղ Պետդեպարտամենտի ղեկավարն ընդգծել Է, որ ԱՄՆ-ի գերակայությունը երկրների վրա ճնշման տնտեսական ու դիվանագիտական լծակների օգտագործումն Է: ԱՄՆ-ի նախագահ Դոնալդ Թրամփը հոկտեմբերի 21-ին Թուրքիային մաքսատուրքերով ու պատժամիջոցներով Է սպառնացել նրա կողմից «անընդունելի գործելակերպի» դեպքում, հաղորդել Է «Ինտերֆաքս»-ը: