Մեկնարկել է Գյումրու «Բարեկամություն» զբոսայգու վերակառուցման ծրագիրը
ԳՅՈՒՄՐԻ, 17 ՀՈԿՏԵՄԲԵՐԻ, ԱՐՄԵՆՊՐԵՍ : «Ավրորա» ֆորումի շրջանակում հոկտեմբերի 17-ին տարբեր երկրներից Հայաստան ժամանած բարերարները, Բարի կամքի դեսպանները եւ «Ավրորա» մրցանակի դափնեկիրները եղան Գյումրիի «Բարեկամություն» զբոսայգում՝ մասնակցելու այգու վերականգման նախագծին նվիրված հանդիսավոր միջոցառմանը: Ծրագիրն իրականացվում է «Հայաստանի զարգացման նախաձեռնություններ» (IDeA) հիմնադրամի՝ Գյումրու զարգացման ծրագրի շրջանակում: Այգու վերակառուցման նախագիծը նպատակ ունի զարգացնել քաղաքի ենթակառուցվածքները եւ արտացոլել բարեկամության ու երախտագիտության խորհուրդը:
Բարեկամության այգին գեղատեսիլ պուրակի կվերածվի` հանգստյան գոտիով, սրճարանով, կարուսելներով: Ծրագիրը կյանքի կկոչվի տարբեր բարերարների ֆինանսական աջակցությամբ: «Ուրախ ենք, որ հատկապես գյումրեցիները կարևորեցին այս ծրագիր: Ծրագիրը համախմբեց շատերին, ու իսկապես սա ընկերության ու բարեկամության այգի է լինելու»,-«Արմենպրես»-ի փոխանցմամբ՝ լրագրողների հետ ճեպազրույցում նշեց գործարար Ռուբեն Վարդանյանը։
Այգին նախատեսվում է շահագործման հանձնել 2022 թվականին: Այն լինելու է եզակի տարածաշրջանում: Այգու ճարտարապետն է Սևակ Պետրոսյանը: «Ուզում ենք կառուցել 2 տարվա ընթացքում: Շինարարությունը կսկսվի 2020 թվականի գարնանը, բայց դեռ շատ հարցեր կան ենթակառուցվածքների հետ կապված»,-նշեց Վարդանյանը՝ չցանկանալով նաև խոսել ծրագրի արժեքի մասին:
Արմենուհի Մխոյան
Բաժանորդագրվեք մեր ալիքին Telegram-ում