Գեղարքունիքի մարզի մթերք արտադրողները մասնակցեցին Արցախում կայացած Բերքի տոնին
ԳԱՎԱՌ, 14 ՀՈԿՏԵՄԲԵՐԻ, ԱՐՄԵՆՊՐԵՍ : Գեղարքունիքի մարզի մթերք արտադրող ինը ընկերություն մասնակցեց հոկտեմբերի 13-ին Արցախի Հանրապետության մայրաքաղաք Ստեփանակերտում կայացած Բերքի տոնին՝ ներկայանալով երկու տաղավարով: Ինչպես «Արմենպրես»-ին տեղեկացրեց Գեղարքունիքի մարզպետարանի գյուղատնտեսության եւ բնապահպանության վարչության պետ Համբարձում Համբարձումյանը, փառատոնում ներկայացվեցին Գեղարքունիքի մարզին բնորոշ ավանդական ուտեստները, պտուղ-բանջարեղենի տեսակները, արտադրված մեղրը, կաթնամթերքը: «Փառատոնն անցավ շուքով, տոնական բարձր տրամադրությամբ:Արցախի մայրաքաղաք էին ներկայացել Հայաստանի բոլոր մարզերից, իսկ մեր մարզից ներկայացել էին Գավառի, Ճամբարակի եւ Վարդենիսի գյուղմթերք արտադրող ու վերամշակող ընկերությունները: Մեր տաղավարներ այցելեցին Արցախի նախագահ Բակո Սահակյանը, Արցախի ԱԺ նախագահ Աշոտ Ղուլյանը, Արցախի Աժ պատգամավորներ եւ կառավարության անդամներ՝ համտեսելով Գեղարքունիքի ուտեստները եւ տալով իրենց դրական գնահատականը: Մեր տաղավարներ այցելեց նաեւ ՌԴ պետդումայի պատգամավոր Կոնստանտին Զատուլինը, ում առավելապես դուր եկավ Քյավառի փախլավայի համը: Փառատոնի ընթացքում մեր մարզի ընկերությունները կատարեցին ապրանքների վաճառք եւ փոխանակում, միմյանց շնորհավորեցին Գյուղաշխատողի օրվա առիթով»,-ներկայացրեց Համբարձում Համբարձումյանը:
Խոսրով Խլղաթյան
Բաժանորդագրվեք մեր ալիքին Telegram-ում