ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:

Այսօր՝ հոկտեմբերի 14 –ին, Հայաստանում իր աշխատանքները կսկսի «Ավրորա» ֆորումը: Այն կմիավորի մարդասիրական, սոցիալական, կրթական և գիտատեխնիկական նորարարության ոլորտների աշխարհի առաջատար փորձագետներին:

ՀՀ էկոնոմիկայի նախարարությունում նախարար Տիգրան Խաչատրյանը հանդես կգա մամուլի ասուլիսով: Նա կներկայացնի վերջին 5 ամիսների ընթացքում նախարարության կողմից իրականացրած աշխատանքները։ 

Վրաստանի վարչապետի Հայաստան այցին ընդառաջ վրացագետ Ջոնի Մելիքյանն ու  քաղաքագետ Նարեկ Մինասյանը կանդրադառնան երկու երկրների համագործակցության հեռանկարներին:

«Հայաստան» համահայկական հիմնադրամը նոր վեբկայք ունի: Հիմնադրամի գործադիր տնօրեն Հայկակ Արշամյանը կներկայացնի կայքի հնարավորությունները:

Երևանում կկայանա «Ճարտարապետություն և շինարարություն արդի խնդիրներ» խորագրով միջազգային 11-րդ գիտաժողովը:

Ալեք Մանուկյան փողոցում տեղի կունենա Համահայկական 1-ին խաղերի կազմակերպիչ, պոլսահայ մարզիկ Շավարշ Քրիսեանի կիսանդրու բացման արարողությունը: Կիսանդրու հեղինակը ՀՀ վաստակավոր նկարիչ Դավիթ Մինասյանն է:

Հայաստանի ազգային գրադարանում Թարգմանչաց տոնի առթիվ կկազմակերպվի թարգմանության զարգացման պատմությունն արտացոլող գրականության ցուցադրություն: