ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում անցկացվող տեղեկատվական տեխնոլոգիաների համաշխարհային համաժողովի՝ WCIT-2019-ի մասնակիցները սոցիալական ցանցերում կիսվում են իրենց տպավորություններով: «Berkeley SkyDeck» ընկերության գործադիր տնօրեն Քերոլայն Վինեթը «Թվիթեր»-ի իր միկրոբլոգում գրել է, որ Հայաստանի էներգիան պարզապես ցնցող է:

«WCIT 2019 համաժողովը մեկնարկեց Հայաստանի վարչապետի ողջույնի խոսքով: Այս երկրի էներգիան պարզապես ցնցող է: Հայաստանը կառուցում է նոր դարաշրջան»,- «Արմենպրես»-ի հաղորդմամբ՝ գրել է Քերոլայն Վինեթը:

#WCIT2019 kicks off in style with the Prime Minister of #Armenia welcoming the attendees. The energy in this country is absolutely stunning. Armenia is building a new era. pic.twitter.com/gH31UV1veA

— Caroline Winnett (@carolinewinnett) October 7, 2019

ՀՀ արտաքին գործերի նախարար Զոհրաբ Մնացականյանը, «Թվիթեր»-ի իր միկրոբլոգում կատարած գրառմամբ, շնորհակալություն է հայտնել «WCIT 2019» համաժողովի կազմակերպիչներին՝ հրապարակելով լուսանկարներ:

Spectacular opening of 23rd #WCIT2019 congress in #Yerevan, #Armenia. The future is now. Congratulations to organizers! pic.twitter.com/yrmBpXO4N3

— Zohrab Mnatsakanyan (@ZMnatsakanyan) October 7, 2019

«Հայաստանում՝ Երևանում «WCIT 2019» 23-րդ համաժողովի տպավորիչ բացումը: Ապագան հիմա է: Շնորհակալություն կազմակերպիչներին»,-նշել է Զոհրաբ Մնացականյանը:

Ավելի վաղ սոցիալական ցանցերում տարածում էին գտել Տեղեկատվական տեխնոլոգիաների համաշխարհային համաժողովի շրջանակում ստեղծված WCIT նվագախմբի համերգի լուսանկարները, տեսանյութերը: Բազմաթիվ քաղաքացիներ, հյուրեր, նշանավոր դեմքերը կիսվում էին իրենց տպավորություններով: Շատերին տպավորել էր նաև աշխարհահռչակ DJ Արմին վան Բյուրենի ելույթը:  

ՏՏ համաշխարհային համաժողովը հիմնադրել է Տեղեկատվական տեխնոլոգիաների և ծառայությունների համաշխարհային դաշինքը։ Համաժողովը կազմակերպում է Առաջատար տեխնոլոգիաների ձեռնարկությունների միությունը։ Այս տարի «WCIT» ՏՏ համաշխարհային համաժողովի թեման է՝ «Ապակենտրոնացման ուժը. ակնկալիք և վտանգ»։ Հոկտեմբերի 6-9-ն անցկացվելիք համաժողովի ընթացքում հանգամանորեն կքննարկվի, թե ինչպես են տեղեկատվական և հաղորդակցության տեխնոլոգիաները թե՛ դրական, թե՛ բացասական առումներով վերափոխում մեր կյանքը, ինչ ազդեցություն են ունենում շահույթի և բարեկեցության, ապահովության և անվտանգության, ժողովրդավարության և մարդասիրության վրա։ Երևանյան համաժողովին սպասվում է ավելի քան 2500 մասնակից՝ 70 երկրից։ Համաժողովը հյուրընկալվում է Հայաստանում՝ ՀՀ կառավարության բարձր հովանու ներքո և աջակցությամբ։