Ժամանակը Երևանում՝ 11:07:36,   21 Հոկտեմբեր

Կալիֆոռնիայի հայ համայնքը պատրաստակամ է ընդունել Ագրարային համալսարանի փորձնակ ուսանողների

Կալիֆոռնիայի հայ համայնքը պատրաստակամ է ընդունել Ագրարային համալսարանի փորձնակ ուսանողների

ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Աշխատանքային այցով ԱՄՆ-ում գտնվող Հայաստանի ազգային ագրարային համալսարանի (ՀԱԱՀ) ռեկտոր Վարդան Ուռուտյանը գործակցության խորացման և ընդլայնման նպատակով հանդիպումներ է ունեցել Ֆրեզնոյի՝ Կալիֆորնիայի նահանգային համալսարանում եւ Փենսիլվանիայի նահանգային համալսարանում։

Ինչպես «Արմենպրես»-ին տեղեկացրին ՀԱԱՀ լրատվության և հասարակայնության հետ կապերի բաժնից, hանդիպումներ են եղել Ֆրեզնոյի համալսարանի նախագահ Ջոզեֆ Կաստրոյի, Գյուղատնտեսական գիտության և տեխնոլոգիայի Ջորդանի քոլեջի, Նորարարությունների և ձեռներեցության կենտրոնի, Ջրային ռեսուրսների տեխնոլոգիական և ինկուբացիոն կենտրոնի ղեկավարների և աշխատակիցների, ինչպես նաև «Ագրիան» ընկերության գլխավոր գործառնական տնօրեն Ադրիանա Մաջարյանի և այլոց հետ: Քննարկումները գլխավորապես ծավալվել են Ֆրեզնոյի նահանգային համալսարանի և Ագրարային համալսարանի միջև գործակցության խորացման, ուսանողների և դասախոսների փոխանակման, վերապատրաստումների, ուսումնաարտադրական համատեղ փորձուսուցումների անցկացման և այլ ուղղություններով:

Հայ համայնքի հետ հանդիպումների ժամանակ Վարդան Ուռուտյանը հավաստիացումներ է ստացել, որ Կալիֆոռնիայի մեր հայրենակիցները պատրաստակամ են փորձուսուցման նպատակով հյուրընկալել ուսանողների ՀԱԱՀ-ից և առհասարակ հայաստանյան բուհերից, ինչպես նաև օժանդակել «Արտերկրում ուսումնառություն» ծրագրով ԱՄՆ-ից Հայաստան ուսանողների գործուղման հարցում: Ֆրեզնոյի հետ գործակցությունը ներառելու է նաև հետազոտական համատեղ նախագծերի իրականացումը:

Ֆրեզնոյի նահանգային համալսարանի Լայլզի նորարարությունների և ձեռներեցության կենտրոնում և Ջրային ռեսուրսների տեխնոլոգիական և ինկուբացիոն կենտրոնում ռեկտոր Ուռուտյանը պատասխանատուների հետ քննարկել է, մասնավորապես, Ագրարային համալսարանի՝ ստեղծման փուլում գտնվող Ագրոտեխնոլոգիական ինկուբատորի շրջանակում գործակցությանն առնչվող հարցեր:

Վարդան Ուռուտյանն այցելել է նաև Կալիֆոռնիայում մեր հայրենակիցների կողմից ավելի քան տասը տարի առաջ հիմնադրված «Ագրիան» ընկերություն, որի հայաստանյան գրասենյակում աշխատում են Ագրարային համալսարանի Ագրոբիզնեսի ուսուցման կենտրոնի շրջանավարտներ:

Կալիֆոռնիայից ՀԱԱՀ-ի ռեկտորն ուղևորվել է Փենսիլվանիա՝ «ՓենՍտեյթ» համալսարան, որտեղ հանդիպումներ է ունեցել «ՓենՍտեյթ»-ի մի շարք ստորաբաժանումների ղեկավարների հետ։ Երկուստեք բարձր գնահատելով «ՓենՍտեյթ»-ի գյուղատնտեսական գիտությունների քոլեջի եւ Ագրարային համալսարանի միջեւ տարիներ ի վեր ծավալված փոխգործակցությունը՝ քոլեջի տնօրեն Ռիչարդ Ռուշի եւ փոխտնօրեն, միջազգային ծրագրերի ղեկավար Դայանա Բեհրինգի հետ Վարդան Ուռուտյանը քննարկել է գործակցության հետագա զարգացման հնարավորությունները։

Գյուղատնտեսական գիտությունների քոլեջը հիմնադրվել է 1855թ․-ին եւ եղել է այն հիմնարար կառույցը, որի շուրջ հետագայում ծավալվել ու զարգացել է այսօր աշխարհի համալսարանների տեղակարգման մեջ մշտապես լավագույն 1 տոկոսի մեջ գտնվող, 100 հազ․ ուսանող և 17 հազ․ դասախոս ունեցող «ՓենՍտեյթ» համալսարանը։

Ռեկտոր Ուռուտյանի հանդիպումների շարքը շարունակվել է Ագրարային ճարտարագիտության, Սննդագիտության ֆակուլտետներում, այլ ստորաբաժանումներում։ Հիշարժան հանդիպումներից մեկը սննդագիտության պրոֆեսոր, Սննդի անվտանգության և որակի ծրագրերի տնօրենի տեղակալ Քեթի Քաթերի հետ էր, որը մեծ ավանդ ունի ՀԱԱՀ-ի Ագրոբիզնեսի ուսուցման կենտրոնում արդեն երրորդ տարին իրականացվող «Սննդի անվտանգության համակարգերի կառավարում» նորարարական կրթական ծրագրի ներդրման եւ դրա հաջողության գործում։ Պրոֆ․ Քաթերի հետ Վարդան Ուռուտյանը քննարկել է դասընթացի շարունակմանն առնչվող հարցեր։ Ի դեպ, ՀԱԱՀ-ում ծրագրի առաջին փուլի հաջողությունը պրոֆ․ Քաթերն այնուհետև հաջողությամբ կրկնել է Ուկրաինայում։




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ