Ժամանակը Երևանում՝ 11:07:36,   21 Հոկտեմբեր

ԱԺ հանձնաժողովը հավանություն տվեց 56 մլրդ դրամ ԱԱՀ պարտքը հարկ վճարողներին վերադարձնելու նախագծին

ԱԺ հանձնաժողովը հավանություն տվեց 56 մլրդ դրամ ԱԱՀ պարտքը հարկ վճարողներին 
վերադարձնելու նախագծին

ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Պետությունը նախատեսում է մինչև տարեվերջ 2571 հարկ վճարողի հետ վերադարձնել ավելի քան 50 մլրդ դրամ ավելացված արժեքի հարկի դեբետային մնացորդները: Առաջարկվող փոփոխությամբ հետ կվերադարձվեն նաև հին դեբետային գումարները, հետվերադարձը կիրականացվի երեք ընթացակարգով:

«Արմենպրես»-ի հաղորդմամբ` ՀՀ հարկային օրենսգրքում փոփոխություններ և լրացումներ կատարելու մասին օրենքի նախագիծն ԱԺ տնտեսական հարցերի մշտական հանձնաժողովում ներկայացրեց ՀՀ ՊԵԿ նախագահ Դավիթ Անանյանը: Դեբետային մնացորդներն առաջացել են հարկային մարմին ներկայացված հարկային հաշվարկում մատակարարներին վճարված ԱԱՀ-ի կամ մաքսային մարմինների կողմից գանձված ԱԱՀ-ի և պարտավորության բացասական տարբերությունից: «Գործող կարգով հարկ վճարողի դիմումի հիման վրա հետ են վերադարձվում 2017-ի հուլիսի 1-ից հետո առաջացած ԱԱՀ-ի դեբետները: Եվ կառավարության որոշմամբ հետվերադարձի ուսումնասիրման և հավաստիացման կարգ էր մշակվել, որով նախատեսված է պարզեցված ընթացակարգ` մինչ 20 մլն ԱԱՀ դեբետների համար: Ըստ էության այս օրինագծով մենք վերացնում ենք հին ու նոր դեբետների անջրպետը: Ասում ենք, որ ընդհանուր բոլոր ԱԱՀ-ի դեբետները ենթակա են հետվերադարձման հարկ վճարողներին` նրանց դիմումի հիման վրա»,-ասաց Անանյանը:

Հաշվի առնելով, որ ընդհանուր դեբետների գումարը կազմում է շուրջ 56 մլրդ դրամ, և մինչև 5 մլն դեբետային գումար ունեցողների թիվը գերազանցում է 2000-ը, պետությունը որոշում է կայացրել երեք ընթացակագով իրականացնել հետվերադարձը: Մինչև 5 մլն դեբետային գումար ունեցողներին վերադարձը կատարվելու է առանց դիմումի և առանց ուսումնասիրություն իրականացնելու, 5-40 մլն դեբետային գումար ունեցողների համար կիրառվելու է պարզեցված ընթացակարգ, իսկ 40 մլնից բարձրի համար կիրառվելու է ուսումնասիրություն և ստուգում: Անանյանը նկատեց` այսինքն այսօրվա գործող 20 մլնի շեմը բարձրացնում, դարձնում են 40 մլն դրամ: Սեպտեմբերի 8-ի դրությամբ շահառուների ընդհանուր թիվը 2835 հարկ վճարող է, որոնցից գործող են 2571-ը, մնացածը` ժամանակավորապես դադարեցված կարգավիճակ ունեն: 2571-ին բաժին է ընկնում 50 մլրդ 748 մլն դրամ:

«Այսինքն` մենք շուրջ 6 մլրդ չենք վերադարձնելու ամենայն հավանականությամբ մինչև տարվա վերջ: Մինչև տարվա վերջ պետք է հասցնենք 2571 հարկ վճարողներին հետ վերադարձենենք այդ 50 մլրդը, որն, ըստ էության, պետության կողմից ֆինանսական միջոցների սրսկում է տնտեսական միջավայր` պարտավորությունների հետվերադարձման միջոցով»,-ասաց Անանյանը:

ԱԺ հանձնաժողովը քննարկումներից հետո միաձայն դրական եզրակացություն տվեց ներկայացված նախագծին:




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ