Մեծ Մասրիկը մշակույթի տան նոր շենքի կարիք ունի
ԳԱՎԱՌ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Մեծ Մասրիկ համայնքում ՀՀ կառավարության կողմից հաստատված սուբվենցիոն երկու ծրագրի շրջանակներում սեպտեմբերի 9-ից մեկնարկել եւ ընթանում են ճանապարհների հիմնանորոգման եւ մշակույթի տան նոր շենքի կառուցման աշխատանքները: Ինչպես «Արմենպրես»-ին տեղեկացրին Գեղարքունիքի մարզպետարանի քաղաքաշինության վարչությունից, սուբվենցիոն առաջին ծրագրով հիմնանորոգվում են գյուղի գերեզմանոց եւ տարրական դպրոց տանող ճանապարհները՝ մեկուկես կիլոմետր երկարությամբ եւ շուրջ 6 հազար քառակուսի մետր մակերեսով:
Ծրագրի պայմանագրային արժեքը կազմում է 82 միլիոն 200 հազար դրամ, որի 60 տոկոսը հատկացրել է ՀՀ կառավարությունը, 40 տոկոսը՝ Մեծ Մասրիկի համայնքապետարանը: Շինարարական աշխատանքները կավարտվեն այս տարվա նոյեմբերի վերջերին: Սուբվենցիոն երկրորդ ծրագրով գյուղի կարիքների համար կառուցվում է մշակույթի տան նոր շենք: Ծրագրի պայմանագրային արժեքը կազմում է 150 միլիոն դրամ, որի 45 տոկոսը հատկացրել է ՀՀ կառավարությունը, 55 տոկոսը՝ Մեծ Մասրիկի գյուղապետարանը:
Շինարարական աշխատանքները նախատեսվում է ավարտել առաջիկա երկու տարիների ընթացքում: : «Մեծ Մասրիկի մշակույթի տան շենքը, որը կառուցվել է նախորդ դարի 40-ական թվականներին, վթարային վիճակում էր, նույնիսկ այն աստիճան, որ հիմնանորոգման համար պիտանի չէր, ուստի դիմեցինք մարզպետարան՝ նոր շենք կառուցելու խնդրանքով»,-ներկայացրեց Մեծ Մասրիկ համայնքի ղեկավար Արմեն Ասատրյանը:
Խոսրով Խլղաթյան
Բաժանորդագրվեք մեր ալիքին Telegram-ում