Քանի շնչում եմ, պետք է զբաղվեմ ժուռնալիստիկայով. լրացավ լրագրող Լևոն Ազրոյանի ծննդյան 82-ամյակը
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Ծննդյան 82-րդ տարեդարձը նշող «Արմենպրես» լրատվական գործակալության երկարամյա թղթակից Լևոն Ազրոյանը երբեք չի զղջացել, որ ընտրել է ժուռնալիստիկայի ոլորտը, թեև մասնագիտական այլ երազանքներ է ունեցել: «Արմենպրես»-ը Լևոն Ազրոյանի հետ զրուցել է նրա լրագրողական գործունեության, ունեցած հաջողությունների և հետաքրքիր հիշողությունների մասին:
«Ես դատապարտված եմ եղել լրագրող դառնալ, թեև, դպրոցական տարիներին երազել եմ դառնալ զինվորական բժիշկ: Նույնիսկ ցանկանում էի ընդունվել Լենինգրադի ռազմական բժշկության ակադեմիա: Քննության նախօրեին թունավորվել էի և ակադեմիա չգնացի: Երբեք չեմ զղջացել, որ ընտրել եմ ժուռնալիստիկայի ոլորտը, որովհետև դա ինձ հնարավորություն է տվել հաճախակի ճամփորդելու: Եղել եմ շատ երկրներում . «Արմենպրես»-ում ինձ բախտ է վիճակվել մոտ 20 տարի լինելու գրեթե բոլոր խոշոր միջոցառումները լուսաբանող թղթակիցը: Դա ինձ հնարավորություն է տվել տեսնելու Խորհրդային Միությունից առ այսօր գրեթե բոլոր ղեկավարներին: Քանի շնչում եմ, պետք է զբաղվեմ ժուռնալիստիկայով»,- ասաց Ազրոյանը:
Լրագրության ոլորտում 55 տարի գործունեություն ծավալող Լևոն Ազրոյանը իր առաջին փորձը ձեռք է բերել Թբիլիսիում լույս տեսնող «Սովետական Վրաստան» թերթում:
«Այսօրվա պես հիշում եմ այդ օրը։ Հորս հետ էի գնացել խմբագրություն։ Բնական է, որ հենց նա էլ առաջինը շնորհավորեց ինձ, շեշտեց, որ ես մուտք եմ գործում մի բնագավառ, որտեղ պետք է աշխատեմ անմնացորդ նվիրումով, լինեմ ազնիվ և անաչառ։ Բավականին պարտավորեցնող խոսքեր»,- պատմեց Ազրոյանը:
«Արմենպրես» լրատվական գործակալության թղթակիցը երբևէ չի խզել իր կապերը Վրաստանի հետ. այնտեղ ծնվել և մեծացել է, կրթություն է ստացել, այնտեղ հանգչում են իր ծնողները, ունի բազմաթիվ ընկերներ:
«Հպարտությամբ եմ ասում, որ չորս-հինգ տարի եղել եմ «Վրացինֆորմ»-ի սեփական թղթակիցը Հայաստանում։ Երևանում ապրելու տարիներիս միշտ ստացել եմ «Սովետական Վրաստան», «Մոլոդյոժ Գրուզիի» և մարզական «Լելո» թերթերը։ Բաժանորդագրվում էի հայերեն, ռուսերեն և վրացերեն թերթերի։ Այդ պարբերականների միջոցով ես քաջատեղյակ էի իմ ծննդավայրում տեղի ունեցող բազմազան և բազմաբնույթ իրադարձություններին, այդ թվում նաև՝ մարզական»,- ընդգծեց նա:
2019 թվականին լույս տեսավ Ազրոյանի հերթական գիրքը` «Դարձ ի շրջանս յուր»-ը, որտեղ ամփոփված են լրագրողի՝ «Արմենպրես» վերադառնալուց հետո գրված 78 ակնարկները` նվիրված հայ ազգին և ոչ միայն, ճանաչված գրողներին, արվեստի և քաղաքական գործիչներին, զինվորներին և այլն:
«Ես շատ եմ սիրում «Արմենպրես»-ը և ինձ համարում եմ արմենպրեսական մինչև ուղն ու ծուծը: Շատ ուրախ եմ, որ իմ ժուռնալիստական գործունեությունը տեղի է ունեցել «Արմենպրես»-ում, որը իր մնայուն հետքն է թողել հայ ժուռնալիստիկայի պատմության մեջ: Ես շատ լավ հիշում եմ այն օրերը, երբ «Արմենպրես»-ը յուրահատուկ բրենդ էր` թերթի ծավալի 70-80 տոկոսը ապահովում էր մեր գործակալությունը»,- եզրափակեց Ազրոյանը:
Բաժանորդագրվեք մեր ալիքին Telegram-ում