ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: «Սվադեշի ջագարան մանչ» հնդկական ազգայնական կազմակերպությունը կոչ Է արել չգնել չինական ապրանքներ, ինչպես նաեւ տնեսական պատժամիջոցներ սահմանել ՉԺՀ-ի ընկերությունների դեմ: Ինչպես հայտարարել Է կազմակերպության առաջնորդ Աշվանի Մահաջանը, այդ միջոցառումները պետք Է դառնան «պատասխան Չինաստանին» այն բանի համար, որ Պեկինն Իսլամաբադին պաշտպանեց Ջամուի եւ Քաշմիրի հարցում:

«Այնպիսի ընկերությունների առջեւ, ինչպիսին Huawei Technologies Co տեխնոլոգիական հսկան Է, ապագայում պետք Է փակվի մուտքը հնդկական շուկա, իսկ չինական ընկերություններին պետք Է արգելվի մասնակցել պետության կողմից անցկացվող հայտամրցույթներին»,-օգոստոսի 23-ին Մահաջանի խոսքը մեջբերել Է NDTV հեռուստաալիքը:

Կազմակերպության ղեկավարի կարծիքով՝ չինական ընկերություններն սպառնալիք են ներկայացնում Հնդկաստանի անվտանգությանը, հատկապես հեռահաղորդակցությունների ոլորտում: Մահաջանը հայտնել Է, որ իր կազմակերպությունը նամակ Է ուղարկել Հնդկաստանի վարչապետ Նարենդրա Մոդիին՝ խնդրելով միջոցներ ձեռնարկել Չինաստանի դեմ, հաղորդել Է ՏԱՍՍ-ը: