Ժամանակը Երևանում՝ 11:07:36,   25 Սեպտեմբեր

Գյումրու դրամատիկական թատրոնը նոր թատերաշրջանը կսկսի վերանորոգված ու առաջնախաղով

Գյումրու դրամատիկական թատրոնը նոր թատերաշրջանը կսկսի վերանորոգված ու 
առաջնախաղով

ԳՅՈՒՄՐԻ, 19   ՕԳՈՍՏՈՍԻԱՐՄԵՆՊՐԵՍԳյումրու Վ. Աճեմյանի անվան պետական դրամատիկական թատրոնում վերանորոգման աշխատանքներն արդեն ավարտված են: Թատրոնի արձակուրդի ընթացքում նորոգվել է մեծ դահլիճը՝ փոխվել է հնամաշ գորգածածկը, վերանորոգվել՝ աթոռները: Անվտանգությունից ելնելով՝  կատարվել է նաև  դահլիճի աթոռների դասավորության փոփոխություն՝ այսուհետ թատրոնը կունենա պարտեր, այնուհետև անցում ու ամֆիթատրոն, նմանատիպ բաժանում մինչ այս չի եղել: Վերանորոգումը կատարվել է թատրոնի սեփական միջոցներով: Մինչ սեպտեմբերի 20-ը՝ 154-րդ թատերաշրջանի բացումը թատրոնում վերջին շտկումներն են իրականացվում: Վերականգնողական աշխատանքներ  են իրականացվել նաև թատրոնի փոքր բեմում, ճեմասրահում:

Թատրոնը միայն թարմ տեսքով չէ, որ պատրաստվում է թատերաշրջանին։ Ստեղծագործական գործընթացը ևս հագեցած է նորություններով։ Հանդիսատեսի դատին կհանձնվի Նիկոլայ Ծատուրյանի «Թռիչքը» այլաբանությունը: «Թատերաշրջանի բացման օրը անակնկալ է սպասում հանդիսատեսին ոչ միայն թատրոնում, այլև թատրոնից դուրս՝ «Թատերական» հրապարակում։ Սակայն դրա  մասին չենք խոսի՝ անանկալն իրական լինելու համար»,-«Արմենպրես»-ին ասաց թատրոնի մենեջեր Նվարդ Ղազարյանը: Լիովին փոփոխված այս թատերաշրջանում  հանդիսատեսին կներկայացվի Գաբրիել Գարսիա Մարկեսի «Երկնագույն շան աչքերը» պիեսը՝ նոր դերակատարներով ու նոր խորեոգրաֆիկ լուծումներով: Հոկտեմբերին արդեն փոքր հանդիսատեսի համար կցուցադրվի նոր մանկական ներկայացում՝ «Բուրատինոյի արկածները»: Արդեն մեկ տարի է թատրոնը համագործակցում է Լիբանանի Համազգայինի «Գասպար Իփեկյան» թատերախմբի հետ: Այս տարի թատրոնի տնօրեն Լյուդվիգ Հարությունյանի հրավերով Գյումրու դրամատիկականում բեմադրություն կանի այդ թատերախմբի ռեժիսոր Հակոբ Տեր-Ղուկասյանը, որը կիրականացնի Արա Արծրունու «Բարի լույս, պարոն Մաթեոս» պիեսի բեմադրությունը: Այն կհնչի ինչպես արևմտահայերն, այնպես էլ արևելահայերն: Այս պիեսի առաջնախաղը տեղի կունենա հոկտեմբերին:  Խաղացանկ կվերադարձվեն նաև «Սիրո քասթինգ», «Փարիզը վտանգավոր  քաղաք է»  երեկոյան և մանկական «Երեք խոզուկները» ցերեկային ներկայացումները: Փոքրիկ   հանդիսատեսի համար կցուցադրվի նաև «Փանոսի արկածները»: Այս ամենից բացի, ընթանում են այլ ներկայացումների փորձեր ևս, սակայն դրանք կլինեն հոկտեմբեր-նոյեմբերին: Ամանորի ներկայացումները նույնպես կուրախացնեն փոքրիկներին ու մեծահասակներին:

Արմենուհի Մխոյան





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ