«Արսենալ»-ը սեփական հարկի տակ հաղթեց «Բարնլի»-ին. Մխիթարյանը չմասնակցեց հանդիպմանը
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Անգլիայի Պրեմիեր լիգայի երկրորդ տուրում Լոնդոնի «Արսենալ»-ը սեփական հարկի տակ 2-1 հաշվով հաղթանակ տոնեց «Բարնլի»-ի նկատմամբ:
Ինչպես հաղորդում է «Արմենպրես»-ը, արդեն հանդիպման 13-րդ րոպեին «Արսենալ»-ի նորեկ Դանի Սեբալյոսի փոխանցումից հետո գոլի հեղինակ դարձավ Ալեքսանդր Լակազետը: Բաց թողած գնդակից հետո «Բարնլի»-ի ֆուտբոլիստները չհանձնվեցին և առաջին խաղակեսի վերջնամասում կարողացան հավասարեցնել հաշիվը. գոլի հեղինակ դարձավ Էշլի Բարնսը:
Այնուամենայնիվ, «Արսենալ»-ին հաջողվեց Պրեմիեր լիգայի երկրորդ խաղում անընդմեջ հաղթանակ տոնել: 63-րդ րոպեին Դանի Սեբալյոսը իր հաշվին երկրորդ գոլային փոխանցումը գրանցեց, իսկ գոլի հեղինակ դարձավ Պյեռ-Էմերիկ Օբամեյանգը:
Հանդիպման մնացած ժամանակահատվածն անցավ փոխնիփոխ գրոհներով, սակայն նոր գոլեր չարձանագրվեցին: Հայաստանի ազգային հավաքականի հարձակվող Հենրիխ Մխիթարյանը պահեստայինների նստարանին էր, սակայն հանդիպմանը չմասնակցեց:
«Արսենալ»-ը Պրեմիեր լիգայի երկրորդ տուրից հետո վաստակել է 6 միավոր:
Բաժանորդագրվեք մեր ալիքին Telegram-ում