Թուրքիայի անվտանգության խորհուրդը քննարկել է Սիրիայում «անվտանգ գոտի» ստեղծելու հարցը
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: Թուրքիայի ազգային անվտանգության խորհրդի նիստի ընթացքում քննարկվել է Սիրիայի հյուսիսում՝ Եփրատ գետի արևելյան շրջաններում, «անվտանգ գոտի» ստեղծելու թեման, ինչը արտացոլվել է խորհրդի նիստից հետո հրապարակված հայտարարության մեջ:
Այս մասին, ինչպես հաղորդում է «Արմենպրես»-ը, հայտնում է թուրքական «Միլլիեթ» լրատվամիջոցը:
«Սիրիայի հետ թուրքական սահմանների անվտանգությունից ելնելով՝ Թուրքիան շարունակելու է տարածաշրջանը մաքրել զինյալներից և ջանք չի խնայելու Սիրիայի հյուսիսում «անվտանգ գոտի» ստեղծելու ուղղությամբ»,- նշված է հայտարարության մեջ:
Սիրիայի հյուսիսում՝ Եփրատ գետի արևելյան շրջաններում, «անվտանգ գոտի» ստեղծելու մասին 2013 թվականին առաջին անգամ հայտարարել է Թուրքիայի նախագահ Ռեջեփ Թայիփ Էրդողանը ԱՄՆ-ում: Ըստ այդ ծրագրի՝ Սիրիայում տեղի ունեցող բախումների պատճառով երկիրը լքող սիրիացիների համար կստեղծվի մի տարածք, որտեղ կապահովվի նրանց անվտանգությունը: Այդ տարածքից պետք է հեռացվեն Քրդական աշխատավորական կուսակցության և մյուս նմանատիպ կազմավորումների զինյալները: «Անվտանգ գոտի»-ն պետք է ունենա 30-40 կմ լայնություն և 460 կմ երկարություն:
Բաժանորդագրվեք մեր ալիքին Telegram-ում