Օսիպյանը խոստացավ անձամբ ձեռնաշղթա հագցնել անօրինական վարորդական վկայական տրամադրող ծառայողներին
13:21, 24 Հուլիս 2019
ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: ՀՀ ոստիկանապետ գեներալ-մայոր Վալերիյ Օսիպյանը խոստացավ փաստերի առկայության դեպքում անձամբ ձեռնաշղթա հագցնել ոստիկանության այն ծառայողներին, ովքեր անօրինական վարորդական վկայականներ կտրամադրեն:
«Արմենպրես»-ի փոխանցմամբ` այս մասին Օսիպյանն ասաց հուլիսի 24-ին հրավիրված մամուլի ասուլիսի ընթացքում:
«Ես փաստ չունեմ, բայց ես մեր հայրենիքի սրտացավ բնակիչներից մեկն եմ եղել, և լսել եմ տարբեր խոսակցությունների ժամանակ, որ վարորդական իրավունքները ձեռք են բերվում այլ ճանապարհներով, և մարդ, չունենալով համապատասխան գիտելիք, այսօր կոչվում է վարորդ և ղեկին է: Եթե ունեք փաստ, ներկայացրեք, ձեռնաշղթաներն անձամբ կհագցնեմ այդ ծառայողների ձեռքերին և անձամբ կփակեմ խցի դուռը նրանց վրա»,- ասաց Օսիպյանը:
Բաժանորդագրվեք մեր ալիքին Telegram-ում