Չեմպիոն Պորտուգալիան հաղթեց Իտալիային. Եվրո-2019
ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ: Երևանում ընթացող ֆուտբոլի Եվրոպայի մինչև 19 տարեկանների առաջնության A խմբի առաջին տուրում մրցեցին մրցաշարի ֆավորիտներից երկուսը՝ Իտալիան և Պորտուգալիան:
«Արմենպրես»-ի հաղորդմամբ՝ «Բանանց» մարզադաշտում կայացած խաղում Պորտուգալիան մի գլուխ բարձր էր Իտալիայից: Նախ առաջին կեսում 28-րդ րոպեին Կարդոսուն առաջ մղեց պորտուգալացիներին: Իսկ երկրորդ կեսի մեկնարկին գերարագ գոլի հեղինակ դարձավ Ռամոսը, ով աչքի ընկավ 46-րդ րոպեին: Մի քանի րոպե անց Պորտուգալիան խփեց նաև երրորդ գնդակը: Այս անգամ գոլը հեղինակեց Ֆելիքս Կորեիան: Իտալիա-Պորտուգալիա՝ 0:3:
Հանդիպմանը մարզադաշտում հետևում էր 3 700 հանդիսական:
A խմբի երկրորդ տուրում Հայաստանի հավաքականը հուլիսի 17-ին կխաղա Իտալիայի հետ (Հանրապետական մարզադաշտ, ժամը 21:00-ին), իսկ Պորտուգալիան ուժերը կչափի Իսպանիայի հետ («Բանանց» մարզադաշտում):
Վարվառա Հայրապետյան
Բաժանորդագրվեք մեր ալիքին Telegram-ում