Ազգային ժողովի պատվիրակությունը Լեհաստան այցի ընթացքում առաջ է քաշել վիզաների ազատականացման հարցը
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: ՀՀ ազգային ժողովի արտաքին հարաբերությունների հանձնաժողովի պատվիրակության Լեհաստան այցի, Սենատի արտաքին հարաբերությունների հանձնաժողովի հետ համատեղ նիստի և այլ հանդիպումների ընթացքում անդրադարձ է եղել նաև վիզաների ազատականացման հարցին: Պատվիրակության անդամները տարբեր տպավորություններ են ստացել այդ քննարկումներից:
«Արմենպրես»-ի հաղորդմամբ՝ նրանք նման տեսակետ հայտնեցին հրավիրված ասուլիսում:
Պատվիրակության անդամ «Լուսավոր Հայաստան» խմբակցության պատգամավոր Արման Բաբաջանյանի տպավորությամբ՝ վիզաների ազատականացման հարցում լեհերը չեն օգնի Հայաստանին: «Նրանք կոնկրետ հարցադրումներ ունեն մեր արտաքին քաղաքականության, մեր հանձնառությունների վերաբերյալ: Եվ, ուրեմն, սպասումները տեղին չեն, եկեք արձանագրենք, որ դրանք պետք է ավելի զուսպ լինեն»,-ասաց Բաբաջանյանը:
Պատվիրակության մեկ այլ անդամ «Իմ քայլը» խմբակցության պատգամավոր Սոս Ավետիսյանը հիշեց, որ վիզաների ազատականացման հարցի քննարկման ժամանակ կար հստակ մեսիջ: «Դա այն էր, որ Հայաստանի վիզաների ազատականացման հարցը որևէ կերպ չպետք է կապվի այլ երկրների վիզաների ազատականացումից հետո ունեցած դեպքերի հետ: Այսինքն՝ պետք է հասկանանք, որ ամեն երկիր ուրույն դեմքով ու դեպքով է քննվելու»,- ասաց նա:
Պատգամավորը դա համարում է շատ լավ ուղերձ: Ավետիսյանը կարևոր համարեց նաև ԼՂՀ-ի հակամարտության վերաբերյալ հավասարակշռված տեսակետներ հայտնելու մասին հարցի քննարկումը: Նա քննարկման այդ ձևաչափը համարեց հայ-լեհական հարաբերությունների զարգացան համար կարևոր։
ՀՀ ԱԺ արտաքին հարաբերությունների մշտական հանձնաժողովի պատվիրակության անդամները Վարշավա էին այցելել հուլիսի 2-4-ը:
Բաժանորդագրվեք մեր ալիքին Telegram-ում