Մետրոպոլիտենի աշխատանքը կվերականգնվի միայն հոսանքի մատակարարման խնդիրը կարգավորելուց հետո
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ: Երևանի մետրոպոլիտենի աշխատանքները կվերականգնվեն, երբ հոսանքի մատակարարման հետ կապված խնդիրը կարգավորվի: «Արմենպրես»-ի հետ զրույցում այս մասին հայտնեց Երևանի քաղաքապետի մամուլի խոսնակ Հակոբ Կարապետյանը:
«Մետրոպոլիտենի աշխատանքները վերականգնվեն, երբ հոսանքի մատակարարման հետ կապված խնդիրները կվերականգնվեն: Այս պահի դրությամբ դեռ խնդիրներ կան»,- ասաց Կարապետյանը:
Ավելի վաղ ՀՀ փոխվարչապետ Տիգրան Ավինյանը տեղեկացրել էր, որ էներգետիկ համակարգում ունենք վթար: Երևանի ՋԷԿ-ը և Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի։ Երևանի տարբեր վայրերում հուլիսի 10-ին ժամը 13-ի սահմաններում էլեկտրականության տատանումներ են գրանցվել:
Հոսանքի ընդհատման պատճառով մետրոպոլիտենի ամբողջ երկայնքով էլեկտրաէներգիայի մատակարարումն ընդհատվել էր: Որոշ հատվածներում գնացքները մնացել էին թունելներում: Այնուհետեւ հոսանքը մասամբ վերականգնվել էր, երթուղու մեջ գտնվող գնացքները մոտեցել էին կայարաններին, որտեղ ուղեւորները տարհանվել են: Իրավիճակը վերահսկողության տակ է:
Բաժանորդագրվեք մեր ալիքին Telegram-ում