Հարցվածների մեծամասնությունը բաց և թափանցիկ է համարում ՀՀ վարչապետի աշխատակազմի աշխատանքը
ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: Միջազգային հանրապետական ինստիտուտի սոցիոլոգիական հարցման մասնակիցների մեծամասնությունը բաց և թափանցիկ է գնահատել ՀՀ վարչապետի աշխատակազմի աշխատանքը:
Ինչպես հաղորդում է «Արմենպրես»-ը, թափանցիկ ու բաց լինելու առումով ՀՀ վարչապետի աշխատակազմի աշխատանքը շատ բարենպաստ է համարել հարցման մասնակիցների 37 տոկոսը, ավելի շուտ բարենպաստ՝ 35 տոկոսը, ավելի շուտ ոչ բարենպաստ՝ 16 տոկոսը, շատ անբարենպաստ՝ 5 տոկոսը:
Հարցման արդյունքների համաձայն՝ ՀՀ վարչապետի աշխատակազմի աշխատանքն ընդհանուր առմամբ բարենպաստ է համարել 72 տոկոսը, անբարենպաստ՝ 24 տոկոսը:
ՄՀԻ հարցումն իրականացրել է Դոկտոր Ռասա Ալիշաուսկենեն Բալթիկ Սըրվեյ/Դը Գելլափ կազմակերպությունից։ Տվյալների հավաքագրումը Հայաստանում իրականացրել է Հայկական սոցիոլոգիական ասոցիացիան։ Տվյալները հավաքագրվել են ողջ երկրում 2019 թվականի մայիսի 6-ից մայիսի 31- ն ընկած ժամանակահատվածում հարցվողների տներում դեմ առ դեմ հարցազրույցների միջոցով։ Ընտրանքը բաղկացած է Հայաստանի 18 տարեկան և բարձր, ընտրելու իրավունք ունեցող 1200 մշտական բնակիչներից։ Ընտրանքը ներկայացուցչական է ըստ ընդհանուր բնակչության տարիքի, սեռի և բնակության վայրի։ Ընտրանքի սխալը նշանակալիորեն չի գերազանցում ողջ ընտրանքի 2․5 տոկոսը։ Հարցումը ֆինանսավորվել է ԱՄՆ Միջազգային զարգացման գործակալության կողմից։
Բաժանորդագրվեք մեր ալիքին Telegram-ում