Դատարանը Մանվել Գրիգորյանի կալանքը գրավով փոխելու միջնորդության վերաբերյալ որոշում է կայացնելու
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Երևան քաղաքի ընդհանուր իրավասության դատարանի դատավոր Մնացական Մարտիրոսյանը մեկ ժամով հեռացել է խորհրդակցական սենյակ՝ ԵԿՄ վարչության նախկին նախագահ Մանվել Գրիգորյանի խափանման միջոց կալանավորումը գրավով փոխելու միջնորդության վերաբերյալ որոշում կայացնելու համար։
«Արմենպրես»-ի հաղորդմամբ՝ դատական նիստի ժամանակ պաշտպան Լևոն Բաղդասարյանը ներկայացրեց «Նաիրի» ԲԿ-ի կողմից տրված բժշկական եզրակացությունների արդյունքներն ու կալանքը կրելու ընթացքում Մանվել Գրիգորյանի մոտ ախտորոշված հիվանդությունները։
Հաշվի առնելով հիվանդությունների լրջությունը՝ փաստաբանը միջնորդություն ներկայացրեց խափանման միջոց կալանավորումը փոխելու և 10 մլն դրամ գրավ կիրառելոը վերաբերյալ:
Մեղադրող դատախազ Վահե Դոլմազյանը դեմ արտահայտվեց Գրիգորյանի խափանման միջոցը փոխելուն:
Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ <<Զենքի մասին>> ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք է բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։
Բաժանորդագրվեք մեր ալիքին Telegram-ում