ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: ՀՀ Ազգային ժողովի նախագահ Արարատ Միրզոյանը ստացել է Սահմանադրական դատարանի նորընտիր դատավոր Վահե Գրիգորյանի նամակը: «Արմենպրես»-ի փոխանցմամբ՝ Վահե Գրիգորյանը նամակով դիմել է Սահմանադրական դատարանի անդամներին, Ազգային ժողովին, Հայաստանի նախագահին, Կառավարությանը, Դատավորների ընդհանուր ժողովին՝ Սահմանադրական դատարանում ճգնաժամի հետ կապված:

«Ես ստացել եմ նամակը, և պատրաստվում եմ այդ նամակն ուղղել մյուս 131 պատգամավորներին, կարծում եմ, որ քննարկման մեծ նյութ և առիթ կա: Իսկապես, ակնհայտորեն անորոշություն կա, ըստ ամենայնի նաև կարելի է խոսել ճգնաժամի մասին: Այսպիսի ճգնաժամերից բոլոր երկրները դուրս են գալիս լայնք քննարկումների ճանապարհով: Փաստարկելով և հիմնավորել ճգնաժամի գոյությունը, Վահե Գրիգորյանը երեք լուծման տարբերակ է տեսնում»,- ասաց Միրզոյանը:

Հունիսի 20-ին ԱԺ-ում Սահմանադրական դատարանի դատավորի երդման արարողությանը Վահե Գրիգորյանը նշել էր, որ երդումը տալիս Սահմանադրական դատարան մուտք գործելիս որպես այս պահի դրությամբ միակ դատավոր, ստանձնում է ՍԴ-ի նախագահի լիազորությունների և պարտականությունների կատարումը:

«…ՍԴ-ի դատավորի երդումը տալիս եմ Սահմանադրական դատարան մուտք գործելիս որպես այս պահի դրությամբ միակ դատավոր, քանի որ մյուս դատավորը այս օրերին բացակայում է երկրից, ես ստանձնելով ՍԴ-ի նախագահի լիազորությունների և պարտականությունների կատարումը, ՍԴ-ի անդամների հետ խնդիրները քննարկելուց հետո նրանց համաձայնությամբ կամ համաձայնության բացակայության դեպքում ընդունելի ձևաչափով այդ մասին կտեղեկացնեմ նաև հանրությանը և իշխանության համապատասխան սահմանադրական մարմիններին, որոնք իրավասու են գործընթացում դերակատարություն ունենալ...»,-նշել էր Գրիգորյանը: