ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Ռումինիայում ՀՀ դեսպան Սերգեյ Մինասյանը հունիսի 26-ին  հանդիպել է Ռումինիայի առողջապահության նախարար Սորինա Պինտեայի (Sorina Pintea) հետ:

Ինչպես «Արմենպրես»-ին հայտնեցին ՀՀ ԱԳՆ լրատվության և հանրային դիվանագիտության վարչությունից, հանդիպման ընթացքում կողմերը քննարկել են առողջապահության ոլորտում երկկողմ հետաքրքրություն ներկայացնող մի շարք խնդիրներ` ներառյալ առողջապահության բնագավառում համագործակցության հետագա ընդլայնման հնարավորություններն ու փորձի փոխանակման և վերապատրաստումների կազմակերպումը։

Նախարարն անդրադարձել է 1994թ. Հայաստանի Հանրապետության և Ռումինիայի առողջապահության նախարարությունների միջև առողջապահության և բժշկագիտության ոլորտում համագործակցության մասին համաձայնագրի վերանայման անհրաժեշտությանը` հույս հայտնելով, որ այն նոր շունչ կհաղորդի առողջապահության նախարարությունների միջև առկա երկկողմ համագործակցությանը:

Հանդիպման ընթացքում ձեռք է բերվել պայմանավորվածություն կազմակերպել մասնագիտական պատվիրակությունների փոխայցելություններ` վերոնշյալ և մի շարք այլ երկկողմ հետաքրքրություն ներկայացնող հարցերի քննարկման ու փոխգործակցության հաստատման նպատակով։