Նորա Գրիգորյանը Հ. Պարոնյանի անվան երաժշտական կոմեդիայի պետական թատրոնում ներկայացնելու է «Սիրելիներից մի բաժանվեք» բեմադրությունը
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: «Սիրելիներից մի բաժանվեք». այսպես է կոչվում Ալեքսանդր Վոլոդինի պիեսը, որի հիման վրա Նորա Գրիգորյանի բեմադրած ներկայացումը հուլիսի 4-5-ին բարձրանալու է Հ. Պարոնյանի անվան երաժշտական կոմեդիայի պետական թատրոնի բեմ:
«Սա իմ առաջին աշխատանքն է Հ. Պարոնյանի անվան երաժշտական կոմեդիայի պետական թատրոնում: Հրավեր ստացա թատրոնի գեղարվեստական ղեկավար Երվանդ Ղազանչյանից ու սիրով ընդունեցի այն: Անչափ շնորհակալ եմ պարոն Ղազանչյանին վստահության համար: Նա ինձ հնարավորություն տվեց ծանոթանալ, աշխատել և սիրել մի նոր հիանալի թատերախումբ` իր տաղանդավոր դերասաններով։ Պետք է խոստովանեմ, որ վերջին անգամ հայերենով ներկայացում բեմադրել եմ ուսանողական տարիներին: Ստացվում է, որ սա իմ առաջին հայալեզու բեմադրությունն է»,- «Արմենպրես»-ի հաղորդմամբ` նշեց Գրիգորյանը:
Խոսելով ստեղծագործության մասին` Գրիգորյանն ընդգծեց, որ Վոլոդինը շատ հուզիչ է գրում: «Պիեսի ընտրության հարցը երկար ենք քննարկել պարոն Ղազանչյանի հետ: Այն պետք է համապատասխաներ թատրոնի ձևաչափին: Պետք է լիներ երաժշտական և կոմեդիայի տարրերով: Ընտրությունը կանգ առավ «Սիրելիներից մի բաժանվեք» պիեսի վրա, որը մարդկային է»,-ասաց բեմադրիչը:
Նրա համոզմամբ` թեև պիեսն ավելի շատ խորհրդային շրջանում ապրող ռուս զույգերի կյանքն է նկարագրում, այնուամենայնիվ, այն խնդիրները, որոնք ծագում են նրանց հարաբերություններում, շատ մոտ են նաև մեր իրականությանը: «Ցավոք սրտի, այսօր շատ զույգեր են բաժանվում, երիտասարդները, այսպես ասած, կոտոշավոր են, և մեկը չի ուզում զիջել մյուսին, արդյունքում կորցնում են այն, ինչ պետք է երկու ձեռքով ամուր պահել: Խոսքը ամենակարևոր ու թանկ զգացմունքի` սիրո մասին է: Աշխատելով այս գործի վրա` հիշեցի հորս խոսքերը: Նա ասում էր, որ բոլոր բեմադրություններում կյանքից փոքր մասնիկ է դնում։ Այստեղ ինքս էլ եմ զուգահեռներ անցկացրել, նմանեցրել, միացրել: Նման իրավիճակներ բոլորիս կյանքում էլ կարող են լինել»,- շեշտեց Նորա Գրիգորյանը:
Ներկայացման մեջ զբաղված է թատերախմբի մեծ մասը: Բեմանկարչություն հեղինակը Լուսինե Կարապետյանն է, պարերը բեմադրել է Նաիրա Հովհաննիսյանը:
Բաժանորդագրվեք մեր ալիքին Telegram-ում