ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Երևանի ավագանին արտահերթ նիստի ընթացքում դեմ քվեարկեց Երևան քաղաքի Աջափնյակ վարչական շրջանի Բաշինջաղյան փողոցի փակուղին անվանի նկարիչ Հենրիկ Ոսկանյանի անվամբ անվանափոխելու նախագծին։ «Արմենպրես»-ի հաղորդմամբ՝ նախագծի հեղինակը Երևան քաղաքի ավագանու «Բարգավաճ Հայաստան» խմբակցության անդամ Մարկոս Հարությունյանն է:

Ավագանու արտահերթ նիստում Հարությունյանն ասաց, որ նկարիչ Հենրիկ Ոսկանյանը ապրել և ստեղծագործել է Աջափնյակ վարչական շրջանի Բաշինջաղյան փողոցի փակուղում: Տվյալ տարածքի բնակիչների ցանկությունն է, որ վերոհիշյալ փակուղին անվանափոխվի հայտնի և սիրված նկարչի անվամբ: Փակուղին անվանափոխելու մեկ այլ պատճառ հանդիսանում է այն, որ տեղի բնակիչների անձնագրերում հասցեները տարբեր կերպով են գրանցված, օրինակ՝Բաշինջաղյան նրբանցք, Բաշինջաղյան 1-ին նրբանցք, Բաշինջաղյան փակուղի, իսկ հստակ անվանակոչումը թույլ կտա նաև խուսափել այս խնդրից:

«Բացի այդ Անաստասավանի բոլոր փողոցները՝ բացի վերը նշվածից անվանակոչված են: Հաշվի առնելով նաև այն հանգամանքը, որ և՛ Հենրիկ Ոսկանյանը, և՛ Գևորգ Բաշինջաղյանը, ում անվամբ էլ կոչվում է Բաշինջաղյան փողոցը, անվանի նկարիչներ են, նպատակահարմար և տրամաբանական է փակուղու անվանափոխման հարցի դիտարկումը»,-ասաց նա:

Նախագծին բացասական եզրակացություն է տվել մշակույթի, կրթության և սոցիալական հարցերի հանձնաժողովը: