ՀՀ ԱԽ քարտուղարը և ՉԺՀ Կոմկուսի քաղաքական-իրավական հարցերի կոմիտեի քարտուղարը պայմանավորվել են կազմակերպել երկկողմ այցելություններ
ԵՐԵՎԱՆ, 18 ՀՈՒՆԻՍԻ, ԱՐՄԵՆՊՐԵՍ։ ՀՀ անվտանգության խորհրդի քարտուղար Արմեն Գրիգորյանը հունիսի 18-ին Ռուսաստանի Դաշնության Ուֆա քաղաքում «Անվտանգության հարցերը համակարգող բարձրաստիճան ներկայացուցիչների ամենամյա տասներորդ հանդիպման» շրջանակներում հանդիպել է ՉԺՀ Կոմունիստական կուսակցության կենտրոնական հանձնաժողովի Քաղբյուրոյի անդամ, քաղաքական-իրավական հարցերի կոմիտեի քարտուղար Գո Շենկունի հետ։
Ինչպես «Արմենպրես»-ին տեղեկացրին ՀՀ անվտանգության խորհրդից, հանդիպման ընթացքում կողմերը ընդգծել են հայ-չինական հարաբերությունների հարուստ պատմական փորձը և «Մեծ Մետաքսի ճանապարհ»-ի գաղափարի շուրջ ծավալված համագործակցության վերականգնման կարիքը՝ «Մեկ գոտի, մեկ ճանապարհ» ծրագրի շրջանակներում։
ԱԽ քարտուղար Արմեն Գրիգորյանը հատուկ անդրադարձ է կատարել Հյուսիս-հարավ ճանապարհի կառուցման ծրագրում չինական կողմի հետաքրքրվածության և ներդրումային հնարավորությունների բարձրացման կարևորությանը և հայկական կողմի շահագրգիռ մոտեցմանը։
Քարտուղար Շենկունը կարևորել է Հայաստանի կողմից Մեկ Չինաստանի սկզբունքի ընդունումը և աջակցությունը։
ԱԽ քարտուղարը նշել է Ղարաբաղյան հիմնահարցում Չինաստանի ցուցաբերած մշտապես զուսպ և հավասարակշիռ վերաբերմունքի կարևորության մասին։
Ձեռք են բերվել պայմանավորվածություններ երկկողմ այցելություններ կազմակերպելու շուրջ։
Կողմերը գոհունակությամբ արձանագրել են տարեցտարի ամրապնդվող առևտրա-տնտեսական կապերի և Հայաստան այցելող չինացի զբոսաշրջիկների թվի ավելացման փաստը։
Կարևորվել է Հայաստանի ուժային կառույցների ներկայացուցիչների ներգրավումը չինական կողմի նախաձեռնությամբ կազմակերպվող վերապատրաստման ծրագրերին։
Բաժանորդագրվեք մեր ալիքին Telegram-ում